31 мамыр саяси қуғын-сүргін құрбандарын еске алу күніне орай Сырым ауданындағы “Алаш” саябағында орналасқан қуғын-сүргін құрбандарына арналған ескерткіш алдында құран оқылды.
- Зұлмат жылдары толағай саясаттың құрбаны болған қазақтың ұл-қыздарын еске алып, оларды ұрпақ жадында мәңгі қалдыру мақсатында 1997 жылдың 31 мамыры қуғын-сүргін құрбандарын еске алу күні болып белгіленген еді. Бұл күн еліміз үшін айрықша маңызға ие, - деді аудан әкімі Жұмагелді Батырниязов.
Қуғын сүргінге ұшыраған Алаш арысы Әлмұхамбет Оспановтың ұрпағы Наурызғали Оспанов сөз сөйлеп, аталған күнде арыстарын ұмытпай, құран бағыштаған аудан тұрғындарына алғыс білдірді.
Алаш саябағына жиналған мекеме қызметкерлері мен аудан тұрғындарының назарына Жымпиты халық театрының “CHANEL 5” қойылымынан үзінді сахналанды.
Салтанатты жиын қуғын-сүргін құрбандары мен Алаш арыстарының ескерткіштеріне гүл шоқтарын қоюмен қорытындыланды.
Айжан Амангелдина,
Сырым ауданы
zhaikpress.kz
