Тасқала ауданы әкімі Талғат Шакиров Қосшы ауылдық округінің әкімі Сансызбай Рахимовты қабылдап, зейнет жасына жетуімен құттықтады.
Аудан басшысы мерейтой иесіне аудан экономикасының дамуына ерекше үлес қосып, басшылық қызметтерді абыроймен атқарғаны үшін құрмет көрсетіп, иығына шапан жапты.
– Зейнет жасы – адам өмірінің мағыналы белесі. Саналы ғұмырын бала-шағасына арнап, еліне қызмет еткен еңбектің зейнетін көретін уақыт. «Біз үлкенге – құрмет, кішіге – ізет» деген аталы сөзді ұрпағының бойына сіңіріп өскен халықпыз. Сіздің жүріп өткен жолыңыз бен еткен еңбегіңіз бізге, қала берді кейінгі ұрпаққа үлгі. Өзіңізді сонау қиын кезеңдердің сан алуан белесімен жүріп өтіп, Тасқала ауданының дамуына сүбелі үлес қосқан тұлға деп айта аламын. Бүгінгі жеткен зейнет жасыңыз құтты болсын. Аман жүріңіз! – деді Талғат Асқарұлы өз сөзінде.
Аталмыш іс-шараға аудан әкімінің орынбасары Рауан Рахметуллин, аудандық мәслихат төрағасы Жанар Бисенғалиева, аудандық қоғамдық кеңес төрағасы Ганмирлан Тұрғанәлиев, аудандық ардагерлер кеңесінің төрағасы Жәрдемғали Балықов, еңбек ардагері Б.Тасмағамбетов пен ауылдық округ әкімдері, мекеме, ұйым басшылары қатысты.
Салтанатты шарада сөз алғандар Сансызбай Бақтығалиұлына жылы лебізін білдіріп, сый-құрметін көрсетті.
– Елге қызмет етудің, оның ішінде мемлекеттік қызметтің қазіргі таңда жауапкершілігі мол екені айтпаса да белгілі. Осындай жауапкершілігі мол қызметті абыроймен алып жүрген Сансызбай Бақтығалиұлының ауданымыздың дамуына қосқан үлесі бүгін ерекше бағаланып, құрметті демалысқа шығып жатыр. Әрине, зейнет демалысына шығу – өмірдің тоқтағаны емес, керісінше, өмір жолындағы жиған білімі мен тәжірибеңді кейінгі жас ұрпаққа дәріптеп, оларға тура жол көрсету. Ал Сансызбай Бақтығалиұылының көп жылдық қызметтегі тәжірибесі жастарға азық болары сөзсіз. Сондықтан сізді қоғамдық өмірден алшақтамай, одан әрі өңіріміздің дамуына өзіндік үлесін қоса береді деп ойлаймын, – деді Жәрдемғали Абылғалиұлы.
Гүлмира Мақанова
Тасқала ауданы
