“Қыз тәрбиесі - ұлт тәрбиесі” пікірсайыс турнирі өтті

Жас пікірсайысшыларды үздік командалармен бәсекелестікке үйретіп, достық қарым-қатынасты нығайтып, дебат ортасын қалыптастыруды, төрешілердің тәжірибесін, құзіреттілігін шыңдауды мақсат тұтқан турнирге Сырым ауданының білім беру мекемелерінен 10 команда, Орал қаласының оқушылар сарайынан, Бөрлі, Теректі аудандарының мектептерінен, барлығы 16 фракция қатысты.

Аудандық білім беру бөлімінің шақыртуымен пікірсайысшыларға әділ бағасын беру үшін Орал қаласынан білікті дебатерлер облыстық дебат турнирлерінің координаторы Ерсұлтан Жалмұқан мен жас маман Алтынай Бақытжанова арнайы келді. Одан бөлек, аудандық SYRYM TOBE төрешілері турнирге қазылық етті.

Турнирде жас дебатерлер ер бала мен қыз баланың тәрбиесі, Қазақстан-гендерлік теңдікке ең қолайлы мемлекет, 20-ғасыр қазақ әдебиетіндегі қыздар бейнесінің басты өкілі секілді өзекті қарарлар бойынша ойнады.

Ойын нәтижесінде, Аяулым Сырымбет “Үздік спикер”,  Жанна Қазбек “Үздік оратор”, Әмина Мералы “Үздік парламентарий”,  Алтынай Бақытжанова “Үздік төреші” аталымдарына лайық деп танылып, көзге түсті.

Жас ораторлар арасындағы пікірсайыс турнирінің қорытындысы бойынша ІІІ орын бөрлілік “Ферра Торр”, ІІ орын Орал қалалық Оқушылар сарайының “Айназ” фракциясына берілсе, І орын да Оқушылар сарайының фракциясы “Dauble Naz” еншісінде.

Аудан тарихында бұрын соңды болмаған аталмыш аймақтық пікірсайыс турнирінің өтуін ұйымдастыруда Сырым лицейінің ұжымы мен SYRYM TOBE дебат орталығының төрешілері белсенділік танытса, Сұлтанбек Исламғалиев, Ильяс Рахымқұлов, Қайрат Ерғалиев, Мейрамбек Мамбетьяров секілді бірақатар ел азаматтары қаржылай қолдау көрсеткендігін айта кету керек.

Турнирге қатысқан жас ораторлар мен жетекшілері де ұйымдастырушыларға ерекше алғыстарын білдірді.