Жуырда Тасқала ауданы орталығындағы Садық Жақсығұлов атындағы орта мектепте белгілі қоғам қайраткері, ауданның құрметті азаматы Сатқали Сапаровты еске алуға арналған шахматтан жасөспірімдер арасында ашық біріншілік өтті. Оның ашылу салтанатына аудан әкімінің орынбасары Талғат Шакиров, ел ағалары мен қоғам қайраткерінің ұрпақтары қатысты.
Алдымен сөз алған аудан әкімінің орынбасары Талғат Асқарұлы айтулы тұлғаның өмір жолына қысқаша тоқталып, жарысқа қатысушыларға сәттілік тіледі. Сатқали Сапарұлының ұлы Абылғали Сатқалиұлы жылы лебізін білдіріп, жарысқа қатысушы жастарға алғыс айтты. Қоғам қайраткерінің ұрпақтарының демеушілігімен өткізілген жарысқа аудан мектептерінен барлығы 15 жасөспірім қатысып, өз бақтарын сынады. Жарыс нәтижесінде қыздар арасында Айя Елеукенова І орынды қанжығасына байласа, Наргиза Идрисова ІІ орын, Назерке Намазова ІІІ орынды қанағат тұтты. Ұлдар арасында Марлен Сапақовтың асығы алшысынан түсіп І орынды иеленді. Батыр Жақсығұлов ІІ орын, ал Әлімбек Ермеков ІІІ орыннан көрінді. Жарысқа белсенді қатысушылар Сатқали Сапаров қоғамдық қорынан естелік сыйлықтар мен алғысхаттарға ие болды. І орынға ие болғандар 15000 теңге, ІІ орын - 10000 теңге, ал ІІІ орынға ие болғандар 5000 теңге ақшалай сыйлықтармен марапатталды.
Орайы келгенде айта кетсек, Сатқали Сапаров 1928 жылы дүниеге келген. Ұлы Отан соғысының ардагері. Отты жылдарға 14 жасынан куә болған жандардың бірі. Кейін Жаңақала, Бөрлі аудандық қаржы бөлімдерінде, аудандық кеңестің атқару комитетінде басшылық қызметтерде істеген. 1967 жылдан өмірінің соңына дейін Жаңақала, Камен аудандық комитетінің бірінші хатшысы қызметін абыройлы атқарған. Ауданның экономикасын, әлеуметтік жағдайын көтеріп, нығайтуға өлшеусіз еңбек сіңіргені үшін «Еңбек Қызыл Ту», «Құрмет белгісі» ордендерімен марапатталды. Оның құрметіне Жаңақала, Тасқала аудандарының орталық көшелеріне есімі берілген.
Гүлмира Мақанова,
Тасқала ауданы
zhaikpress.kz
