Теріс ағымдардың қызметіне тосқауыл қойып, діни экстремизмнің алдын алуда ақпараттық үгіт-насихат шараларының маңызы зор. Осы орайда Бөкей ордасы аудандық ішкі саясат бөлімінің ұйымдастыруымен мешіт жамағатының діни сауаттылығын арттыру мақсатында онлайн форматта діни сайыс өтті.
Сұрақ-жауап түрінде өткізілген бұл шара үш кезеңнен тұрды. Сайыстың алғашқы кезеңінде бес парыздың бірі оразаға қатысты сұрақтар қойылса, екінші кезеңде Мұхаммед пайғамбардың (с.а.с) өміріне қатысты білген-түйгендерін ортаға салды. Үшінші кезеңнің шарты бойынша қатысушылар бір минуттың ішінде мақал-мәтелдер айтып жарысты. Айта кетелік, сайысқа қатысушылардың білім деңгейлерін ауданның бас имамы Қуандық Насыров және жастармен жұмыс жөніндегі ресурстық орталықтың теолог маманы Мұратхан Нәбиғалиев бағалап, жеңімпаздарды анықтады. Үш кезеңде де түрлі сұрақтарға мүдірместен жауап берген Кенжебек Қадырұлы І орынды еншілесе, Шыңғыс Әділбекұлы ІІ, Райымбек Жұмабайұлы ІІІ орын иеленді.
Нұрай Таубай,
Бөкей ордасы ауданы
zhaikpress.kz
