Жазушы, халықаралық «Алаш» әдеби сыйлығының лауреаты, Мұқадес Есламғалиұлының шығармашылығын дәріптеуге арналған «Шығармалары - халық қазынасы, ұрпақ несібесі» атты облыстық байқаудың қорытынды кеші аудандық кітапхананың залында өтті.
Көрнекті қаламгер, ұлт мақтанышына айналған Мұқадес Есламғалиұлының өмірі мен шығармашылығын насихаттауға арналған шараға қаламгердің туыстары Шәкір Төлегеновтың зайыбы Ұмсындық Есламғалиева облыстық орталықтандырылған кітапханалар жүйесі байқауға қатысушылар мен оқырмандар қатысты.
Шара алды Мұқадес Есламғалиұлының өмірі мен шығармашылығына арналған, «Өтелген парыз» бейнефильмі ұсынылып, әнші Сәлімжан Әубәкіровтің орындауында «Ауылым» әні тыңдармандарын ерекше баурап алды.
Жерлес жазушының шығармаларын оқырман қауымға кеңінен насихаттауда ауданда дәстүрлі түрде байқаулар ұйымдастырылуда.
Атап айтсақ, 2021 жылы алғаш рет облыстық деңгейде «Қанатты сөз, қарымды қалам иесі» тақырыбында жыр мүшәйрасы, «Көрікті ойдың көркем бейнесі» тақырыбында иллюстраторлар байқауы, «Орамды ой қарымды қалам» эссе байқауы, 2022 жылы «Ұмытылмас, өшпес бейне» тақырыбындағы шығарма байқауы ұйымдастырылды.
Ал биыл үшінші рет «Шығармалары халық қазынасы, ұрпақ несібесі» тақырыбындағы байқау ақпан мен маусым айы аралығында өтті.
Байқау екі бағыт, «Асқақ рухты өр тұлға» тақырыбында оқырмандар арасында мақала жазу байқауы және «Мұқадес мұрасы мәңгілік» тақырыбында кітапханашылар арасында үздік әдістемелік құрал байқауы.
Мақала жазу бағыты бойынша оқырмандардан 37 жұмыс, үздік әдістемелік құрал бағытында кітапханашылардан 16 жұмыс қабылданды.
Қатысушылардың жұмысын бағалау үшін құрылған комиссия мүшелері жөнінде тоқталсақ комиссия төрағасы «AMANAT» партиясы аудандық филиалының төрағасы Талғат Дарғожиев, мүшелері Ж.Молдағалиев атындағы облыстық әмбебап ғылыми кітапханасы директорының орынбасары Нұрлыгүл Сағыновамен әдістемелік библиографиялық бөлімнің әдіскері Майра Татенова, аудандық Сырым елі газетінің тілшісі Мүсірбек Айташев.
Алғашқы сөз кезегін алып, шара мақсаты жөнінде тоқталған Талғат Мұратұлынан соң байқау жеңімпаздары марапатталды.
«Асқақ рухты өр тұлға» тақырыбында оқырмандар арасында мақала жазу байқауының жеңімпаздарын марапаттаған Мүсірбек Әлібекұлы ұстаз, оқырман Арман Ғабдықұлды І орын жеңімпазы ретінде танылғандығын хабарлады.
Сондай ақ бұл бағыттағы 2-інші, 3-інші орын иегерлері де белгілі болды.
Ал Мұқадес мұрасы мәңгілік, тақырыбында кітапханашылар арасында облыстық үздік әдістемелік құрал байқауының жеңімпаздарын Нұрлыгүл Сағынова бейнеролик арқылы хабардар етті.
Жеңімпаздарды Талғат Мұратұлы марапаттап, жетістіктерімен құттықтады. Сөйтіп бұл бағыттағы кітапханашылар арасындағы облыстық байқауының І орын жеңімпаздары болып Орал қалалық кітапханалар жүйесінің әдіскерлері Толқынай Сарбаева мен Мөлдір Тоғайбаева марапатталды. Ал бұл бағыттағы жеңімпаз танылған 2-інші, 3-інші орын иелерінің де есімдері аталып жүлделер тапсырылды.
Шарада қаламгерге арналған жерлес ақындардың арнау өлеңдерін кітапханашылар Л.Берғалиева, А.Жетпісов, К.Мамбеталиева әсерлі оқыды.
«Кемел ойлы көркем сөзді жазушы» тақырыбындағы кітап көрмесін библиограф Эльмира Әлденова жатық тілмен жеткізді. Қамшының сабындай қысқа ғұмыр сүрген талантты жазушы М.Есламғалиұлының өмірі мен шығармашылығы өскелең ұрпақтың жадында мәңгілік сақталады.
Шараға қатысқан кеш қонақтары Шәкір, Ұмсындық Төлегеновтер, Талғат Дарғожиев, Мүсірбек Айташев, Гүлбақша Ерғалиева, Раушан Қапанова сөз сөйлеп қазақ прозасында өзіндік қолтаңбасы қалған жазушының шығармалары мәңгілік жасай беретіндігін, ұрпақ үшін тәрбиелік мәні зор екендігіне тоқталды
Тағылымды шарада М.Есламғалиұлы атындағы аудандық орталықтандырылған кітапхананың директоры Айнұр Уалиахметова сөз сөйлеп, қатысушыларға, қонақтарға алғыс сезімін білдірді.
Айжан Бауыржанқызы,
Сырым ауданы
zhaikpress.kz
