Қазан айында Теректі аудандық "Теректі жаңалығы-Теректинская новь" қоғамдық-саяси газеті ұжымы оқырмандар арасында ұтыс ойындарын өткізуді жоспарлаға еді.
Достық үйінде осыған орай шара өтіп, аудандық басылымға жазылу науқаны қорытындыланды.
Аудандық ішкі саясат бөлімі басшысы Жаннұр Ахметов газеттің рөлі, пайдасы мен маңызына ерекше тоқталды. Жаннұр Бекбауұлы Теректі ауданы әкімі Әділ Жоламанов бастаған аудандық газетке жазылу эстафетасының жоғары деңгейде өткенін атап өтіп, бастаманы қолдаған теректіліктерге алғыс білдірді. "Теректі жаңалығы-Теректинская новь" газетіне ұжым болып жазылған Ақжайық мектебі, Теректі аудандық лингвистикалық гимназиясы және Федоров қазақ мектебінің ұжымы аудан басшысының алғыс хаттарын иеленді. Алғыс хаттан бөлек редакция ұжымы дайындаған сыйлықтарды қоса еншіледі.
Газет редакторы Нұрзия Сисенбаева әр оқырманның басылым үшін маңызды екенін айтып, аудандық газетпен әрдайым бірге болуға шақырды. Редактор Федоров қазақ мектебінің оқушысы Меруерт Абуеваға "Ең жас оқырман", аудан тұрғыны, ардагер ұстаз Меңсұлу Кумашеваға "Тұрақты оқырман" аталымдарын табыстады. Газетімізге жазылу науқаны кезінде қолдау көрсеткен, аудан басшысы бастаған эстафетаның жоғары деңгейді өрбуіне үлес қосқан, округ тұрғындарының газет ұжымымен кездесуіне мүмкіндік жасаған Долин ауылдық округі әкімдігі де ескерусіз қалмады. Жеке кәсіпкер Роллан Бектеміров газетке жасаған қамқорлығы үшін редактордың Алғыс хатымен марапатталды.
Кеш шырайын аудандық мәдени-демалыс орталығының өнерпазы Елжас Мағзомның орындауындағы әсем әндер кіргізді.
Кезек ұтыс ойындарына да келді. Оқырмандар ынталандыру сыйлықтарына ие болып, марқайып жатты. Дегенмен, басты сыйлық ноутбуктен әрбір теректілік үмітті еді. Сайып келгенде, ноутбук аудан тұрғыны, аудандық психологиялық-педагогикалық түзеу кабинетiнiң əлеуметтiк педагогi Диляра Саиноваға бұйырды. Жылды осылайша қорытындылаған аудандық газет ұжымы оқырмандарын елеп-ескеріп, Жаңа жылда тың идеялармен кездесуге уәде берді.
Әділет Орынбасаров
Теректі ауданы
zhaikpress.kz
Батыс Қазақстанның маңызды жаңалықтарын біздің Instagr am-дағы парақшамыздан және Telegram арнамыздан алғашқы болып біліңіздер
