Бүгін Тасқала ауданындағы Сәулет мектеп-лицейінде облыстық білім басқармасының қолдауымен «Елінің елеулі азаматы» атанған, математиканы оқыту мен жас ұрпақты тәрбиелеу жұмыстарын тұтастыра жүргізудің үздігі, ұстаз Досымғали Қабдешұлын еске алуға арналған ұстаздар арасында математикалық регатадан облыстық турнир өтті.
Шараға аудан әкімінің орынбасары А.Баяндықов, ардагер ұстаз Б.Тасмағамбетов, педагогикалық ғылымдарының доценті, Қазақстан инновациялық және телекоммуникалық жүйелері университетінің профессоры, ҚР білім беру саласының құрметті қызметкері Өтебай Құспанов, ұстаздың әріптестері мен туыстары қатысты.
Ашылу салтанатында сөз алған аудан профессоры, ҚР білім беру саласының құрметті қызметкері Өтебай Құспанов Досымғали Қабдешұлының азаматтық тұлғасы жайлы жылы естелігімен бөлісіп, жарысқа қатысушыларға сәттілік тіледі.
Жалпы білім турниріне барлығы 12 команда қатысып, бақ сынасты. Турнирдің қорытындысында бірінші орынға оралдық «Архимед» командасы ие болса, екінші орынды шыңғырлаулық «Константа» мен бәйтеректік «Аксиома» командалары еншіледі. Үздік үштіктен Ақжайық ауданынан келген «Феномен», қаратөбелік «Серпін», теректілік «Жалын» және тасқалалық «Пифогор» командалары көрінді.
Болатбек Сапарғалиев
Тасқала ауданы
zhaikpress.kz
Батыс Қазақстанның маңызды жаңалықтарын біздің Instagram-дағы парақшамыздан және Telegram арнамыздан алғашқы болып біліңіздер
