Ел Тәуелсіздігінің 30 жылдығы қарсаңында Бәйтерек ауданы орталығы – Переметный ауылындағы мәдениет үйінде ҚР мәдениет саласының үздігі, әнші-сазгер Гүлбаршын Қасиетованың «Өнерім мен өмірім егіз менің» атты шығармашылық концерті өтті.
Бар өмірін өнер саласына арнаған майталман әншінің кеші ел тәуелсіздігінің 30 жылдығына арналды. Талай өлеңге ән жазып, тыңдарман жүрегінен орын тапқан көптеген өлмес туынды авторының кешіне аудан әкімі Марат Тоқжанов, Казталов ауданы әкімінің орынбасары Зәйлім Мәжитова, БҚО мәдениет басқармасының бөлім басшысы Сәуле Қарабалина, Қазақстан жазушылар одағының мүшесі, бірнеше жыр жинағының авторы, ҚР мәдениет саласының үздігі Дариға Мұштанова, ҚР мәдениет саласының үздігі, «Ерен еңбегі үшін» медалінің иегері Баян Хабиева, ҚР мәдениет саласының үздігі, дәстүрлі әнші, термеші Зияш Аманғалиева және өнер иесінің тындармандары келді.
-Дара таланты, шебер ұйымдастырушылық қабілетімен ерекшеленетін Гүлбаршын апамыздың аудан мәдениетіне қосқан үлесі зор. Шығармашылықпен қатар қоғамдық жұмысты да абыройлы атқарған еңбегі ел есінде мәңгі қалады. Оның ұлт тарихы мен әдебиеті және мәдениетіне қосқан үлесі қашан да жоғары бағаланады.
Киелі сахна төрінде тыңдарманның риясыз қошеметіне бөленіп жүре беруіне тілектеспін. Гүлбаршын Ғұмарқызының ел бірлігі мен жарқын болашақты жырлаған әсем әндері жалғасын таба берсін,-деді өз құттықтауында аудан басшысы Марат Тоқжанов.
Сондай-ақ өзінің ақжарма тілегін жеткізген БҚО мәдениет басқармасының бөлім басшысы Сәуле Қарабалина Казталовтан Бәйтерек топырағына келген өнер иесінің таланты мен шығармашылығын дамытуға мүмкіндік берген аудан халқына ризашылығын білдірді. Одан бөлек, Казталов ауданы әкімінің орынбасары Зәйлім Мәжитова да жүрекжарды лебізін білдіріп, өнер иесіне туған жерінің сәлемін жеткізді.
Кеш барысында көрерменге Гүлбаршын Қасиетованың «Бір қызың келді ауылға», «Ән өлкем», «Туған жер», «Әжеме», «Қайран біздің әжелер арды ойлаған», «Ақжайық», «Жезкиікті көрсемші», «Сүрініп кетпе», «Беу қыздар-ай», «Шынардың жапырағы», «Періште қыз», «Сағыныш», «Өнерім мен өмірім егіз менің» атты әндері шырқалды.
Гүлбаршын Ғұмарқызының әндерін Жаңылсын Хасанова, Еркін Өтегенов, Жаскелең Ғайсағалиев, Назира Хибашева, Ажар Сейтенова, Күләш Қуанышқалиева, Ақмарал Ахметова сынды өңірге танымал әншілер мен аудан өнерпаздары көпшілікке ұсынды.
Ерекше сарын, өзіндік қайталанбас стилі бар ән көрерменді баурап алды.
-2010 жылы туған жерімді қиып, қазіргі Бәйтерек ауданына қоныс аудардым. Аудан орталығындағы мәдениет үй жанынан «Ақ ниет» әжелер ансамблін құрып, еңбек жолымды жалғастырдым. Бәйтерек топырағында 15 жаңа ән шығардым. Тәуелсіздік тойына тарту етіп отырған есептік концертім – мені жатсынбай, өнеріме шын бағасын бере білген бәйтеректік ағайынға деген рахметім. Концертімді өткізуге мұрындық болған аудан басшылығы мен мәдениет бөліміне және күні кеше құрылған «Шың» әдеби-сазды театрының ұжымына аналық алғысымды білдіремін,-деді шара соңында Гүлбаршын Ғұмарқызы.
Түгелбай Бисен,
Бәйтерек ауданы
zhaikpress.kz
