Бөкей Ордасы аудандық балалар мен жасөспірімдер туризмі және экология орталығының ұйымдастыруымен «Табиғатты аяла» тақырыбында аудандық форум өтті.
Оның ашылу салтанатында сөз алған аудан әкімінің орынбасары Лариса Қайырғалиева өлкеміздегі тарихи жерлерге қысқаша тоқталып, қаладағы осындай форумдар мен байқауларға барып, жетістікке қол жеткізген жастарымызды атап, қатысушыларға сәттілік тіледі. Сондай-ақ форумға «Нұр Отан» партиясы аудандық филиалы төрағасының бірінші орынбасары Тілеген Арыстанбеков пен білім беру бөлімінің басшысы Ержан Иманбаев қатысты.
Аталмыш шара пленарлық және сарамандық бөлімінен тұрды. Пленарлық кезеңінде оқушылар құсайыновтық Сымбат Құбайтова (10-сынып) «Мұратсай ауылдық округінің топонимикасы», жәнекешевтік Аружан Қуанғалиева (8-сынып) «Ауылым – алтын бесігім» тақырыбындағы баяндамасын слайд арқылы таныстырып, түсіндірді. Жәңгірхандық Шархан Батырғалиев (10-сынып) «Бөкей ордасы ауданындағы туризм түрлері», сағырбаевтық Жанбота Еділбаева (10-сынып) «Адам – табиғаттың бір бөлігі» баяндамаларын көпшіліктің назарына ұсынды. Ал мәметовалықтар Тәуке Пайызов (9-сынып) «История 196 Краснознаменной Гатчинской стрелковой дивизий», Абылай Жұмағалиев (8-сынып) «Бытовые отходы поселка Сайхин», бегалиевалық Гүлнұр Көшербаева (10-сынып) «Аралсор көліндегі «Artemia salina» шаянының популяциясын сақтап қалу», бабажановтық Рада Манасова (5-сынып) «Сайқын ауылының тарихы» атты жұмыстарын қорғаса, жексенбаевтық Темірлан Маратов (10-сынып) «Заманауи смартфондар арқылы экологиялық мәдениетті насихаттау жолдарын» баяндап, замандастарына ой салды.
Шараның сарамандық бөлімі Сайқын ауылындағы «Қару аманаты» саябағында жалғасты. Онда жас туристер ауыл ішіндегі тарихи ескерткіштерге берілген маршуттық карта бойынша экскурсиялық бағдарлаудан және туризм орталығы ауласындағы жасанды жартасқа өрмелеп, туристік кедергілер жолағынан өтуден шебер-сынып өткізді. Мәмбет ауылындағы алма бағына саяхат жасап, «Турист өз терегіңді отырғыз» акциясы шеңберінде жеміс ағаштарын отырғызды.
Форум қорытындысында аудандық білім бөлімінің басшысы Ержан Мақсотұлы қатысушылар мен олардың жетекшілеріне сертификат пен алғысхат табыс етті.
Айша ҚҰРМАШ
Бөкей ордасы ауданы
