22 маусым күні Казталов ауданына қарасты Бірік ауылдық округінің, Қыркөл қыстағында, «Багисов» шаруа қожалығынан өрт шықты. Аудандық төтенше жағдайлар департаменті берген мәліметке сүйенсек, қожалықтағы өткен жылғы 237 тонна шөп өртенген.
- Өрт 22 маусым күні шамамен 22:55-те бастау алған. Шаруа қожалықтағы шамамен 2500 шаршы метр аумақты алып жатқан 237 тонна шөп өртенген. Өртті сөндіруге аудандық төтенше жағдайлар бөлімінің мамандары, №11 өрт сөндіру бөлімінің қызметкерлері, 7 техника, 4 өрт сөндіруші жұмылдырылды. Өрт сөндіру жұмыстарына Бірік және Тереңкөл ауылдық округтерінің тұрғындары да қатысты. Өрт 23 маусым күні 13:13-те оқшауланып, 15:05-те толық сөндірілді. Оқиға орынында Ақжайық ауданының Жаңабұлақ кентінің 1972 жылғы тұрғыны зардап шекті, - деді Казталов ауданының төтенше жағдайлар бөлімінің бастығы Ерген Тасқалиев.
Казталов аудандық ауруханасы директорының емдеу ісі жөніндегі орынбасары Ануар Сапаров зардап шеккен азаматтың жағдайы ауыр екенін атап өтті.
- 23 маусым күні сағат 01:43-те, Казталов аудандық ауруханасына Әжібай ауылынан 1972 жылғы азамат келіп түсті. Науқасқа бастың, беттің, жоғарғы тыныс жолдарының, көздің, ауыз қуысының, магистральдың, жоғарғы аяқтың, төменгі аяқтың 3-4-дәрежелі термиялық күйігі диагнозы қойылып, шұғыл медициналық көмек көрсетілді. Науқастың денесін 85 пайыз күйік шалған, қазіргі таңда жағдайы ауыр, - деді ол.
Өрт неден шыққаны әзірге белгісіз. Қазіргі таңда өрттің шығу себебін анықтау мақсатында тергеу амалдары жүргізілуде.
Асылбек Нәсіпқали,
Казталов ауданы
zhaikpress.kz
