Тасқала аудандық жастармен жұмыс жөніндегі ресурстық орталықтың ұйымдастыруымен отбасылар арасында «Саналы ұрпақ – сапалы отбасы» атты спорт сайысы өтті.
Іс-шараның мақсаты – отбасы құндылығын ұлықтау, балалар мен атааналарға ойындар орындата отырып, спортқа деген қызығушылығын арттыру, денсаулығын нығайту, саламатты өмір салтын ұстануға тәрбиелеу.
Сайыс үш кезеңнен тұрды. Атап өтсек, аққала жасау, эстафеталық жарыс, мергендікті анықтау. Жарысқа бес отбасы қатысты. Барлығы белсенділік танытып, мықтылығын дәлелдеді. Тартысты өткен сайыс қорытындысында І орынды Ы. Алтынсарин атындағы мектептің атынан қатысқан Мұқашевтар отбасы жеңіп алды. ІІ орынды Амангелді мектеп-бөбекжай-бақша кешені атынан шыққан Алдабергеновтар жанұясы иеленсе, ІІІ орын Қаныш Сәтбаев мектеп-гимназиясының намысын қорғай келген Нұртазиндер шаңырағына бұйырды.
– 1 және 2-сынып оқитын балаларымызбен сайысқа қатыстық. Бүгінгі жарыс жоғары деңгейде өтті. Осы бағыттағы іс-шаралар жиі ұйымдастырылса екен. Көңіл күй керемет, – дейді Садық Жақсығұлов мектебінің атынан қатысқан Мәмбетовтар отбасының мүшесі Асылгүл Рахматуллина.
Назерке Шайхолла,
Тасқала ауданы
zhaikpress.kz
