Переметныйда Кеңес әскерінің Ауған жерінен шығарылғанына 37 жыл және ҚР Қарулы күштері құрамындағы бітімгерлік батальонының Тәжік–Ауған шекарасынан шығарылғанына 25 жыл толуына орай «Ардагерлер – асыл ерлер!» атаумен салтанатты іс-шара ұйымдастырылды.
Мерекелік жиынның басында қонақтар аудандық мәдениет үйінің фойесінде арнайы дайындаған кітап көрмесін тамашалады. Содан соң кеш шымылдығы «Шың» театры әртістерінің композициялық қойылымымен ашылды.
Бұл ардагерлер – Отан алдындағы қасиетті борышын абыроймен атқарған, ел тыныштығы үшін өмірін қатерге тіккен айбынды жандар. Олардың әрқайсысы – өскелең ұрпаққа үлгі боларлық қайсарлықтың, батылдықтың, отансүйгіштіктің символы. Кеш барысында осынау жайтқа кеңірек тоқталған ауданы әкімінің орынбасары Ерлан Ғалиев бұл іс-шараның жас ұрпақ тәрбиесіндегі маңыздылығын да атап өтті. Азаматтық борышын абыроймен өтеген ардагерлерге ризашылығын білдірген соң олардың бірқатарына аудан әкімінің алғыс хатын табыстады.
Кеш барысында Ауған соғысы мен бітімгерлік қызмет жылдарынан сыр шертетін патриоттық әндер орындалды. «Ауғанстанда болған күн», «Офицер жан-жары», «Синева», «Тәжік-Ауған», «Письмо из Афганистана», «Ардагерлер» секілді әндер көрермендерге ерекше әсер сыйлады. Ал кеш шымылдығы «Мен қазақпын» әнімен жабылды.
Гүлім Жұмағалиева
Бәйтерек ауданы
