Переметныйлықтар аудан ауруханасына аса қажетті оттегі концентратын сатып алу үшін ақша жинауда.
Әлеуметтік желіде желдей ескен осы ақпараттың рас-өтірігін анықтамақ ниетпен қаржы жинау жәшігі қойылған аудан орталығындағы «Центральный» дүкеніне бас сұқтық. Бізді қарсы алған сауда орнының қожайыны Жансауле Мәжитқызы ақпаратты растап, бастаманы көтерген жан оның інісі, «Шапағат шамшырағы» қоғамдық бірлестігінің жетекшісі Сахид Мәжит екенін айтты.
-Қазір қазақ елі ғана емес, барша әлем қиын жағдайда. Күн санап ушыққан ауру дес беретін емес. Осынау қиын шақта көпшілік болып, ауруханаға көмек қолын созсақ деген ниетпен қаржы жинауды қолға алдық. Аудан азаматтары қолдан келген көмегін аяп жатқан жоқ. Мақсатымыз індет жұқтырғандарға аса қажетті бес аппарат сатып алу, -деді Сахид телефон арқылы хабарласқанымызда.
Қаржы аударып, жақыныңа көмек қолын созам десең +7 705 545 22 91 нөміріндегі Каспий голд есепшотына ақша аударуға болады. Шот иесі Жансауле Мәжитқызы. Немесе қолма-қол ақшаны аудан орталығындағы «Центральный» дүкеніндегі арнайы жәшікке сала аласыз.
Түгелбай Бисен,
Бәйтерек ауданы
zhaikpress.kz
