Подстепныйлықтар үшін биыл, яғни, 2024 жыл су тасқынынан бөлек жағымды жаңалықтармен есте қалмақ.
Аталмыш ауылда ауқымды жұмыс атқарылып жатқанын жоққа шығара алмаймыз. Үйлер қалыпқа келді. Енді жаяу жүргіншілерге арналған жол, ауылішілік жолдар күрделі жөндеуден өтіп, ретімен пайдалануға беріліп жатыр.
Солардың бірі – Бәйтерек көшесіне төселген су жаңа асфальт. Міне, жол құрылысы мәреге жетіп, тұрғындар көше тойын ұйымдастырып, мәре-сәре болды.
Бәйтерек көшесінің жұртшылығы «ТОБИ» ЖШС сапалы аяқтаған жолға дән риза. Ағынан жарылып батасын берген Төлеген, Лұқпан, Мейіржан есімді ел азаматтарының қуанышынан осыны аңғарамыз.
Ауыл әкімі Мейірбек Сұлтанов та ағайынның ортасынан табылып, жақсылықпен бөлісті. Өз кезегінде тұрғындарға қолайлы жағдай жасалуы үшін тырысқан аудан әкімдігіне алғысын білдірді.
Бізде Бәйтеректегі көңілі бәйтеректей, пейілі дархан тұрғындардың қуанышына ортақпыз. Ағайынның бірлігіне қарап, аталмыш көшеге тұрғын болғың келеді екен, шіркін-ай!..
Ақтілек Әлібекұлы
Теректі ауданы
