7 мамыр - Қазақстан Республикасының Отан қорғаушылар күні. 1992 жылдың 7 мамыры ҚР Қарулы күштері құрылғандықтан, бұл күн «Отан қорғаушылар» мерекесі болып жарияланды. Біздің ата-бабамыз түрлі қанқұйлы соғысты басынан өткізді. Олар ұрпақтарының бейбіт елде өмір сүруін қалады. Осынау айтулы мерекеде Ұлы Отан соғысы мен тыл ардагерлері, Ауған мен Тәжік-Ауған қақтығыстарының және тағы басқа ұрыстардың ардагерлеріне құрмет көрсетіледі. Мереке күні қаламыздың «Наурыз» саябағында «Сарбаздар – Отан айбыны!» атты шара өтті.
-Ауданымыздың барлық тұрғындарын 7 мамыр Отан қорғаушылар мерекесімен құттықтаймын. Отан қорғаушы қасиетті және қастерлі ұғым болып есептеледі. Елімізге сырттан жау келгенде, қиындық туындағанда біздің Отан қорғаушыларымыз төтеп береді. Біз шекарасы айқындалған бұзылмас елде тату-тәтті өмір сүрудеміз. Еліміз аман және тыныш болсын, - дей келе аудан әкімінің орынбасары Алтай Тоғжанов бірқатар азаматтарды аудан әкімінің алғыс хатымен марапаттады.
Мемлекетіміздің тұғырын нығайтуға бағытталған адал еңбегі үшін Ауған соғысының ардагері Талғат Ақашаев, Тәжік-Ауған шекарасындағы ұрыс қимылдары ардагері Болат Алекешев пен Айбол Ганиев, 1988-1992 ж.ж. Таулы Қарабақтағы этносаралық қақтығыстарды реттеуге қатысқан ұрыс қимылдарының ардагері Ерболат Мусин мен Малик Ұмарғалиев, ҚР Ұлттық Қауіпсіздік Комитеті Шекара Қызметі БҚО бойынша департаментінің «Ақсай» шекара бақылау бөлімшесі аға контролері, лейтенант Елнұрбек Халдыбек пен кіші сержант Қайрат Клышевтар марапатталды. Сонымен қатар Ақсай шекара бөлімшесі бастығының орынбасары, лейтенант Дидар Нұртөлеу мен бөлімшенің 2 мобильдік топ бастығы, кіші сержант Тілекжан Жұмағалиев, Қорғаныс ісі жөніндегі бөлім бастығының әскери-патриоттық және Қарулы Күштер ардагерлерімен жұмыс бойынша көмекшісі Әйгерім Мұханбетжанова мен бөлімнің есеп жүргізушісі Айзара Сүлейменова және қалалық №7 ЖОББМ –нің алғашқы әскери және технологиялық дайындық пәнінің оқытушысы, Бақытжан Үмбетовтер аудан әкімінің мерекемен құттықтаған алғыс хаттарын алды.
-Біздің отандастарымыз үшін бұл мереке батырлық пен табандылық, Отан сүйгіштік пен Отанға мінсіз қызмет етудің нышаны болып табылады. Қай дәуірде болмасын Отан қорғау ҚР әр азаматының борышы болып табылады. Қазақстан әскерінде қызмет етіп жатырған және Ұлы Отан соғысының ардагерлері, жауынгер интернационалистер, Таулы Қарабақ және де Тәжік-Ауған соғысының ардагерлері, кез келген уақытта Отан қорғауға даяр азаматтарымызды шын жүректен осы мерекемен құттықтаймын, - деді аудандық қорғаныс істері жөніндегі бөлім бастығы Азамат Әділгерейұлы.
Ауған соғысы ардагерлері мен Тәжік-Ауған шекарасындағы қақтығыстарға қатысқан ардагерлер Ришат Насыров, Виктор Тюркин, Тауфих Баширов, Альберт Жандалиев, Орынғали Саинов және Кәкімғали Имакаевтарға аудандық қорғаныс істері жөніндегі бөлім бастығы Азамат Жансейтов мерекемен құттықтап, аудандық қорғаныс бөлімі басшысының алғыс хаттарын табыстады.
Мереке күні саябаққа қаламыздың тұрғындары көп жиналды. Мерекелік шара аудандық мәдениет үйінің өнерпаздары дайындаған концерттік бағдарламамен жалғасты.
Айдана Абдрахманова,
Бөрлі ауданы
zhaikpress.kz
