Елі үшін еңбек етіп, жанын қиған боздақтар есімі тарих беттерінде алтын әріптермен жазылып қалады. Егемендік жолында тер төгіп, сын сәттерде қайсарлық танытқан боздақтарымыз қуғын-сүргінге ұшырап, жер аударылды, атылды, халық жауы деген жалаға қалды. Біраз жылдан соң ақталғандар есімі «Азалы кітапқа» еніп, жыл сайын еліміз 31 мамыр күні жазықсыз жапа шеккендерге тағзым етеді. Десе де, әлі күнге дейін деректердің дәлдігі жоқтығынан көптеген арыстарымыз ақталмай келеді.
Мемлекет басшысы Қасым-Жомарт Кемелұлы Тоқаев саяси қуғын-сүргін құрбандарын толық ақтау жөнінде мемлекеттік комиссия құрған болатын. Соған сәйкес, Бәйтерек ауданында арнайы комиссия құрылып, жұмысын бастады.
Жуырда арнайы топ Дариян ауылында «Саяси қуғын-сүргін құрбандарын ақтау жөніндегі аймақтық комиссиялардың қызметін ұйымдастыру әдіснамасы» тақырыбында отырыс өткізді.
- Саясат салқыны салдарынан жазықсыз жапа шегіп, ауыр айып арқалаған боздақтарымызды ақтау — біздің баба алдында атқарар үлкен еңбегіміз. Өлкетанушы, архив, мұражай қызметкерлері мен ел тарихына қызыққан азаматтардың басын қосып, қуғын-сүргін құрбандары туралы деректерді жинақтау қажет. Ол істі бастап та кеттік, - деді жиынды ашып жүргізген аудан әкімінің орынбасары Ерікқали Бисақаев.
Сонымен қатар Ерікқали Ғұмарұлы осы бағыттағы жұмысқа волонтерлерді де тарту керектігін қадап айтты.
Кейін сөз алған аудандық ішкі саясат бөлімінің басшысы Нұржан Дүзбатыр ауданның Приурал аймағында саяси қуғын-сүргін құрбандарының ұрпақтары көп екенін айтып, қуғынға ұшыраған, бірақ ақталмаған құрбандар мен зардап шеккендер жайлы мәліметтер жинақтау және олардың ұрпақтарын іздестіру жұмыстарын жүргізу керектігіне тоқталды.
Жиынға қатысқан «Арна» аудандық әйелдер қоғамының мүшесі Руза Самарцева, аналар кеңесінің мүшесі Рахила Бабақожақызы да өз пікірлерін айтып, алдағы уақытта аталған жұмыстарға белсене қатысатындықтарын жеткізді. Сондай-ақ дарияндық өлкентанушылар мен тарихшылар және қарапайым тұрғындар да игі іске көмек көрсетуге әзір деген ойдамыз.
Гүлжан Аязбаева,
Бәйтерек ауданы
