Бүгін аудан әкімі Тимур Шиниязов Тау ауылына барып, ауыл тұрғындарына жаңадан сайланған әкім Нұртілек Мизамбаевты таныстырды. Тимур Серікұлы жаңа әкімнің жұмысына сәттілік тілеп, сенім үдесінен шығып, елге жақын болуды тапсырды. Аудандық аумақтық сайлау комиссиясының төрағасы Жарқын Хаирлиев куәлік табыстады.
Айта кетейік, Ұзынкөл ауылдық округі әкімінің сайлауына «AMANAT» партиясынан 1, өзін-өзі ұсынумен 2 үміткер қатысты. Дауыс беру нәтижесінде Нұртілек Ниетбайұлы Тау ауылдық округінің әкімі болып сайланды.
Нұртілек Мизамбаев 1989 жылдың 13 тамызында Атырау облысы, Құрманғазы ауданы, Ұштаған ауылында дүниеге келген. 2011 жылы М.Өтемісов атындағы Батыс Қазақстан мемлекеттік университетін «Информатика пәнінің мұғалімі» мамандығы бойынша тәмамдаған. Еңбек жолын 2011 жылы Бөкей ордасы ауданы, Жиекқұм ауылындағы Т.Масин атындағы орта мектебінде математика пәнінің мұғалімі болып бастаған.
Әр жылдары Бөкей ордасы ауданы, Хан ордасы орта мектебінің ұзартылған күн тобының мұғалімі, математика, физика пәндерінің мұғалімі, Жәнібек ауданы, Жәнібек ауылындағы А.Оразбаева атындағы негізгі мектебінде математика, информатика пәндерінің мұғалімі, мектеп директорының міндетін атқарушы, Жәнібек ауданы, Жәнібек ауылындағы мектептен тыс жұмыстар орталығы директорының міндетін атқарушы, орталықтың директоры, орталықтағы бұқаралық бөлімнің басшысы қызметтерін атқарған.
Отбасылы, үш бала тәрбиелеп отыр.
Гүлзара Мәди,
Жәнібек ауданы,
zhaikpress.kz
