Шалқар ауылдық округінде есептік кездесуін жалғастырған аудан басшысы ауылдың шаттығы шалқып тұрғанына куә болды. Көреген қариялары, ізетті жастары жиынға қатысып, ауылдың бүгіні мен ертеңі туралы сөз қозғады. Артық эмоцияға берілмеді. Тиісінше мәдениетті әрі ұстамды қалыппен өз сауалдарын қойды.
Ауылдық округ бойынша 3 елдімекен бар. 2024 жылдың 1 желтоқсанындағы есеп бойынша Сарыөмірде 1351, Дуанада 109, Шалқарда 146 адам ғұмыр кешеді. Елдімекендерді түнгі уақытта жарықтандыруға 2 миллион 491 мың теңге бөлініп, 15 жарық шам іске қосылған. Көше жарығының бірқалыпты жұмыс істеуін қамтамасыз ету үшін электротехникалық материалдар сатып алыныпты. Сонымен қатар ауылдың тазалығына да көңілдің бөлінгені жан жадыратты. Сенбіліктердің жиі өтіп, оған қарапайым ауыл тұрғындарынан бастап, мекеме қызметкерлеріне дейін жұмылып, 100 түп көшет еккені бар. Бұл жылда «Ауыл аманаты» бағдарламасының арқасында кәсібін дөңгелеткендердің 4-еуі құс шаруашылығын қолға алып, 1-еуі мал шаруашылығына кіріскен.
Аудан орталығынан ең шалғай ауылдық округтің автомобиль жолдары туралы айтпай кетуге болмас. Округ орталығы Сарыөмір ауылына дейін тасжолды күтіп ұстауға жауапты мердігер «Шыңғыс» ЖШС арнайы техникалардың көмегімен уақытында жолды тазалап, тегістеп отырады екен. Ауыл әкімі Шынтемір Тілешжанов бұлардан бөлек білім беру, денсаулық сақтау, ауыл шаруашылығы, мәдениет және спорт, әлеуметтік салаларына кеңірек тоқталды. 2025 жылға да жоспарын ұмыт қалдырмай, өзекті мәселелерге тоқталды.
Әрине ауыл болған соң мәселе де болады. Дегенмен Шалқардағы жұдырықтай жұмылған тұрғындарды көріп, береке мен татулықтың көрінісін көрдік.
Ақтілек Әлібек
Теректі ауданы
