Шыңғырлау ауданының әкімі Мұрат Өмірәлиев аудан аумағындағы мекемелерді басқарып отырған әйелдер қауымын қабылдады.
Әрбірі бір мекемнің тізгінін ұстап, аудан экономикасына, дамуы мен өркендеуіне өзіндік үлестерін қосып жүрген басшы азаматшаларды келе жатқан көктемнің шуақты мерекесі - Халықаралық әйелдер күнімен құттықтап, жылы лебізін білдірді. Алғысхаттарымен марапаттап, гүл шоқтары мен шағын сый-сыяпаттарын табыстады.
Кейін аудандық ауруханада болып, медицина саласының нәзік жанды қызметкерлерін құттықтады. Әркез адам жанының арашасы болып, жауапкершілігі мол қызметтің жүгін арқалап жүргендері үшін, еткен елеулі еңбектері үшін алғысын білдірді. Құттықтау хаттарын табыстап, жұмыстарына сәттілік тіледі.
Медицина саласының ардагерлерімен кездесіп, мерекелерімен құттықтады. Апа-әжелердің басы қосылған үстел басында есті әңгімелер айтылып, жылы лебіздер жеткізіліп жатты.
Гүлжазира Асу,
Шыңғырлау ауданы
