Шыңғырлау аудандық дене шынықтыру-сауықтыру кешенінде 4 күннен бері өткізіліп жатқан КСРО спорт шебері Еділ Ишекеновты еске алуға арналған бокстан 2011-2012 жылы туған кіші жасөспірімдер арасында ашық Республикалық турнир өз мәресіне жетті.
Дәстүрлі турнир ауданымызда 31 рет өткізіліп отыр. Еліміздің әр өңірінен 21 команда, жалпы 240-қа жуық жас спортшы келіп, қатысты. Аудан боксшыларын қосқанда 300-ге жуық спортшы сынға түскен тартысты дода болды.
Ауданымызға арнайы келген 2012 жылғы Лондон олимпиадасының чемпионы, «VAL BARKER» кубогінің иегері, танымал боксшы Серік Сапиев финалдық ойынды тамашалап, жас спортшыларды қорытынды жекпе-жекте жігерлендіре түсті.
Аудан әкімі құттықтау сөз сөйлеп, жүлдегерлерді, олардың бапкерлерін жеңістерімен құттықтап, аталмыш турнирдің демеушілеріне алғысын жеткізді. Осындай ауқымды доданың өткізілуіне қолдау көрсеткен бас демеуші Серік Қазиев, Бауыржан Жантлеуов, сондай-ақ Мусин Руслан, «Усманғалиев» шаруа қожалығы басшысы. Бұл қолдаушыларға ұйымдастырушылар, қатысушылар, шыңғырлаулықтар дән риза.
Төрткүндік жарыста үздік нәтиже көрсеткен, әр түрлі салмақ дәрежесіндегі жүлдегер боксшыларды аудан әкімі Мұрат Өмірәлиев, олимпиада чемпионы Серік Сапиев, ауданның құрметті азаматы, бапкер Александр Пятин, бас демеуші Серік Қазиев, «Арон» бокс клубының директоры Арон Акиев, спорт ардагерлері Ават Измаилов, Мұхит Жұмашев, Альберт Исламбеков марапаттады. Жеңімпаздарға диплом, медальдар, ақшалай сертификаттар табысталды. Және ерекше көзге түскен спортшыларға, төрешілерге номинациялар мен сыйлықтар табысталды. Турнирдің демеушісі Серік Қазиев Шыңғырлау ауданының боксшыларына бокстық формаларды сыйға тартып, тағы да бір қуантты. Еділ Ишекеновтың досы, Орал қаласындағы «Арон» бокс клубының басшысы Арон Акиевтің атынан, Ишекеновтер әулетінен де жарыста үздік жекпе-жек көрсеткен спортшыларға сый-сыяпаттар, ақшалай сертификаттар табысталды.
Бұның барлығы аудан спортынның, жалпы бокс спортының тарихында ойып орын алған даңқты боксшы Еділ Ишекеновтың рухына тағзым мен құрмет.
Осындай байрақты бәсекенің ауданымызда жоғары деңгейде өткізілгені үшін барша шыңғырлаулықтардың, қонақтардың, спортшылардың ризашылығында шек жоқ.
Гүлжазира Асу,
Шыңғырлау ауданы
