Шыңғырлау ауылының тұрғындарымен кездесу өтті

Аудан әкімі Мұрат Өмірәлиев Шыңғырлау ауылдық округінің тұрғындарымен кездесті.

Кездесу барысында бірінші болып ауылдық округ әкімі Саида Біркенова округте атқарылған жұмыстар жөнінде есеп беріп, алдағы жоспарларымен бөлісті.

Баяндамада биыл бірқатар маңызды мәселелердің оң шешімін тапқаны айтылды. Атап айтқанда:

• М.Қуантаев көшесінде тұрғындардың жайлы демалысы үшін көлемі 400 шаршы метрді құрайтын алаң салынды;
• Қылышев көшесінде жаяу жүргіншілер жолы мен демалыс алаңының құрылысы жүргізілуде;
• Ұрысай ауылына сапалы интернет желісі тартылды;
• Ақсоғым ауылында жеке кәсіпкер тарапынан «ДЕК» кешенді блок-модулі (КБМ) орнатылды.

Есептік кездесу одан әрі сұрақ-жауап форматында жалғасты.

Тұрғындар өздерін толғандырған бірқатар мәселелерді көтерді. Атап айтқанда, Панфилова көшесінің шыға берісіне төсеме жасау, Л. Қылышев атындағы орта мектептің жағдайы, дене шынықтыру-сауықтыру кешені жанындағы балаларды тамақтандыру мәселесі, сондай-ақ военкомат ауласындағы ағаш бұтақтарын кесу сияқты өзекті сұрақтар қозғалды.

Аудан әкімі барлық көтерілген мәселелер іс-шаралар жоспарына енгізіліп, кезең-кезеңімен шешілетінін жеткізді.

Кездесуден кейін ауыл тұрғындарына жеке қабылдау ұйымдастырылды.

Нұрғали Төлегенов
Шыңғырлау ауданы