Шыңғырлау ауданы әкімі Мұрат Өмірәлиев бірқатар марапат иелерін қабылдады.
Атап айтсақ, аудандық «Серпін» газетінің тілшісі, талай жыл ауданға еңбегі сіңіп, 45 жыл абыройлы қызмет атқарып зейнетке шыққан Айсұлу Арыстанованы құттықтап, алғысхаты мен сый-сыяпатын табыс етті.
Аудандық экономика және қаржы бөлімінің бас маманы, 41 жыл аудан игілігіне еңбек еткен Дина Ерболова мен 36 жыл табан аудармай Сегізсай негізгі мектебінде қазақ тілі мен әдебиеті пәні мұғалімі болып қызмет атқарып жүрген Айгүл Жетмекова Батыс Қазақстан облысының Құрмет грамоталарымен марапатталды.
Талай жылғы еңбектер еленіп, мерейлері үстем болған жандарға аудан әкімі алғысын білдіріп, мереке қарсаңында алған лайықты марапаттарымен құттықтады.
– Сіздерге алғысымыз шексіз. Әрбіріңіздің еңбектеріңізді білеміз, бағалаймыз. Қай саланың да өз артықшылықтары, қиындықтары бар. Соның барлығында білім мен біліктілікті қатар ұстап, адал қызмет етіп келесіздер. Ерінбей еткен еңбектеріңіздің жемісін көріп жүре беріңіздер! - деп жиынды қорытындылады.
Әсел Әлім
Шыңғырлау ауданы
