Шыңғырлау ауданында еркін күрестен 2010-2017 жылғы жасөспірімдер арасында ашық біріншілік өткізілді. Тартысты дода өңіріміздің әр түрлі аудандарынан келген 130-ға жуық жас спортшының басын қосты. Жарыс қызу әрі тартысты өтті. Себебі жас спортшылардың жеңіске деген талпыныстары, дайындықтары мықты.
Жарыс нәтижесінде жеңіске жеткен спортшыларға диплом, медальдар, ақшалай және бағалы сый-сыяпаттар табысталды.
Жалпыкомандалық есепте Қазталов ауданы ІІІ, Бөрлі ауданы ІІ, Шыңғырлау ауданы жүлделі І орынды иеленді.
Жарыстың өтуіне мұрындық болған спортшы Алтынбек Ерболовқа және де демеушілік көрсеткен жас спортшылардың ата-аналарына Шыңғырлау аудандық мәдениет, тілдерді дамыту, дене шынықтыру және спорт бөлімі атынан бөлім басшысы Олжас Сейтимов алғысын жеткізді.
Әсел Әлім
Шыңғырлау ауданы
