Шыңғырлау аудандық AMANAТ партиясы ғимаратында «Қарызсыз қоғам» қаржылық сауаттылық жобасы аясында оқыту курсы өткізіліп жатыр. Бескүндік оқу бағдарламасы несие бойынша қарыздары бар және борышкерлер тізімінде тұрған, дәл қазіргі уақытта несиесі бар, бірақ мерзімі өтіп кеткен берешектері жоқ азаматтарға, жеңілдікпен несие алып, мемлекеттік бағдарламалар бойынша қаржыландырылатын, ісін жаңа бастаған кәсіпкерлерге арналған.
Бұл жоба аясында оқытулар жыл басынан бері көптеп ұйымдастырылып келеді. Оқуда ауыл тұрғындарын, кәсіпкерлермен қатар әр түрлі сала мамандарын қамту жоспарланған.
Курстың жетекшісі, қаржы сарапшысы, жоба менторы Анархан Құттығалиева отбасылық қаржыны тиімді жұмсау, кіріс-шығысты басқару, кәсіп бастау, несиеден құтылу, алаяқтардан сақтану, тағы да басқа әр адамның білуі қажет ақпараттармен бөлісіп, оқытады. Бұл курсты оқу әрбір азаматқа пайдалы болмақ. Оқу соңында қатысушыларға курстан өткені туралы арнайы сертификаттар табысталады.
Қарызсыз қоғам құрып, халықтың қаржылық сауаттылығын арттыру – жобаның басты мақсаты. Бұл – белең алып тұрған мәселелерді шешіп, қарызсыз болашаққа жету үшін жасалып жатқан үлкен қадамдардың бірі.
Гүлжазира Асу
Шыңғырлау ауданы
