Тазалық - табиғат сәні, көкорай - көшенің көркі. Көктеммен бірге ауыл-аудан көшелеріне тазалық жұмыстарын жүргізу науқаны бастау алады.
Жұрт жұмылып үй-жайларының айналасын қолға алса, бөлімдер мен мекемелер ұжымдары әлеуметтік нысандар мен қоғамдық орындар тазалығын бастап кетті. Шыңғырлау ауданы орталығындағы мәдени-демалыс саябағында сенбілік өткізіліп, оған барлық мекеме-бөлімдер атсалысты. Саябақ ішінен әрбір ұжымға тазалау телімдері беріліп, ортақ іске күш біріктірген көпшілік саябақтың ескі шөбін шауып, қысқы қоқыстарды жинастырып шығарып тастап, теректер түбін қопсытып шықты.
Көп біріксе күш емес пе, тез жинастырылған қоқыс бірден тіркемелерге тиеліп, шығарылып тасталды. Саябақ іші жасаңғырап, көктем исі кеудені толтырды. Көпшілік көңілді қалыпта сенбілікті тиянақты аяқтады.
Қаршыға Асу,
Шыңғырлау ауданы,
zhaikpress.kz
