Шыңғырлау ауданында Шыңғырлау аудандық мәдениет, тілдерді дамыту, дене шынықтыру және спорт бөлімінің «Жыл қорытындысы–2024» кеші өтті.
2024 жылдың қорытынды кешіне аудан әкімі Мұрат Өмірәлиев, бөлімге қарасты ұжымдар қатысты. Ауданымыздың әлеуметтік-экономикалық, мәдени-рухани дамуына үлес қосып, ауданның тыныс-тіршілігіне араласып, атсалысқан азаматтарды марапаттап, оларға құрмет көрсету үшін арнайы ұйымдастырылған мереке қарсаңындағы кештің алғы сөзін аудан әкімі Мұрат Өмірәлиев сөйледі.
Жыл бойы атқарылған жұмыстар, жеткен жетістіктер, жағымды жаңалықтар мен үлкен қуаныштар жайында айтып өткен аудан басшысы барша кеш қонақтарын Жаңа жыл мерекесімен құттықтап, ақ тілектерін арнады.
Кейін 2024 жылда елеулі еңбек етіп, ерекше көзге түскен жандар Батыс Қазақстан облысы әкімдігінің, облыстық мәдениет басқармасының, БҚО дене шынықтыру және спорт басқармасының, Шыңғырлау ауданы әкімінің алғысхаттарымен марапатталды.
Аудандық мәдениет, тілдерді дамыту, дене шынықтыру және спорт бөлімінің алғысхаттарын басшысы Олжас Сейтімов лайықты иелеріне табыстады. Сондай-ақ аталмыш бөлім мен оған қарасты мекемелердің іс-шараларына жыл бойы ақпараттық қолдау білдіргендері үшін аудандық ішкі саясат бөлімі басшысы Айгүл Джоламанова мен аудандық «Серпін» газетінің директор-редакторы Қаршыға Елемесовке ризашылығын білдіріп, алғысхаты мен сый-сыяпатын табыс етті.
Аудан өнерпаздары орындаған әндер мен шағын кофе-брейк он екі айға шолу жасалып, жыл қорытындыланған кештің сәнін келтірді.
Гүлжазира Асу
Шыңғырлау ауданы
