Жуырда аудандық жастармен жұмыс жөніндегі ресурстық орталығының және «Шыңғырлау жастары» жастар қоғамдық бірлестігінің ұйымдастыруымен «Жыл үздігі - 2020» жастар премиясын табыстау кеші өтті.
Жастардың бір жылғы еңбегі сараланатын, келер жылға жаңа мақсатпен, жаңа күшпен беттеуге жол сілтейтін бұл шара жыл сайын өткізіледі. Кеште аудан әкімі Әлия Мұханбетжанова сөз сөйлеп, барша жиналған жастарға сәттілік тіледі. Әлемдегі жағдайға қарамастан батылдық танытып, қайсарлық пен адамгершіліктің бейнесін көрсетіп жүргендері үшін жастарға алғыс білдірді. Байқау комиссиясының шешімімен 2020 жылдың қорытындысы бойынша өз саласында үздік деп танылған 10 жас марапатталды. Атап айтсақ,
«Үздік жас көшбасшы» - Мейірман Болатұлы Мендалиев,
«Үздік жас медицина қызметкері» - Сатыбалды Артурқызы Сағидоллаева,
«Үздік жас полиция қызметкері» - Мейрамгүл Абатқызы Османғалиева,
«Үздік жас өнерпаз» - Айдос Достөреұлы Исекенов,
«Үздік жас ұстаз» - Гүлім Болатқызы Құрманбаева,
«Үздік жас спортшы» - Тоқтар Бауыржанұлы Байғабұлов,
«Үздік жас маман» - Жастілек Дулатұлы Дулатов,
«Үздік студент» - Регина Владимировна Андреева,
«Үздік волонтер» - Армат Болатұлы Тайконов,
«Үздік шекарашы» - Нұрәлі Бақытжанұлы Оспанәлиев.
Осындай үздіктеріміз жастарымызға үлгі тұтарлықтай, бойындағы күш-жігерін, мотивациясын оятатындай тұлға ретінде қалыптасса, ауданымыздың мерейі емес пе?! Бір-біріне қарап бой түзеп, ұлтжанды азамат пен азаматша болып қалыптасуда үлгі тұтар адамдардың болуы маңызды. Үздіктеріміз ендігі тоқтап қалмай, әрі қарай да өздерін дамытып, барша қазақ елі мақтан тұтатын азамат пен азаматша болуларына тілектеспіз.
Кеш соңы шағын концерттік бағдарламамен қорытындыланып, барша жиналған тамаша көңіл күймен қайтты.
Айбарша Леккерова,
Шыңғырлау ауданы
zhaikpress.kz
Регина Андреева, «Үздік студент»:
«Жыл үздігі» премиясы өте керемет өтті, маған өте қатты ұнады. Жылы атмосфера, позитивті орта, барлығы кештің жақсы өтуіне өз септігін тигізді. Ұйымдастырушыларға үлкен рахмет. Қанша студент ішінен үздік деп танылу мен үшін үлкен мәртебе. Алдағы уақытта сабағымды жақсы оқып, еліме адал қызмет ететін білікті маман болуға тырысамын. Әрдайым осындай керемет шаралар өткізіле берсін деген ізгі тілегім бар!
Армат Тайконов, «Үздік волонтер»:
-Шара өте жоғары деңгейде өтті. Осындай деңгейде шаралар ұйымдастырып жүрген аудандық жастар ресурстық орталығына алғысым шексіз. Үнемі жастарды қолдап, демеу беріп отырады. Барлығымыздың міндетіміз – халыққа адал қызмет ету. Аз да болса халқыма пайдам тисе, мен үшін содан асқан марапат жоқ. Сонда да көп еріктілер арасынан мені үздік деп танып, марапаттағаны, әрине, қуантты. Алдағы уақытта да елім үшін аянбай қызмет ететін боламын және барымша көмек қолын созатын боламын.
