Шыңғырлау ауданының намысын қорғап, жас болса да биік белестерді бағындырып, үлкен чемпионаттарда жоғары нәтиже көрсетіп жүрген бірқатар жерлестеріміз «Спорт шеберлігіне кандидат» разрядтарын иеленді.
Жылдар бойы жаттығуы, түрлі байқауларда көрсете білген өнерлері өз нәтижесін беруде. Атап айтқанда, дзюдо күресінен аудандық, облыстық біріншіліктердің жеңімпазы, республикалық чемпионаттардың жүлдегері Саин Алдиярға «Дзюдо күресінен ҚР спорт шеберлігіне кандидат» разряды берілді. Дәл осы дзюдо спорт түрінен түрлі байқаулардың жеңімпазы Клышбаев Нұрасыл да «Дзюдо және қазақ күресінен ҚР спорт шеберлігіне кандидат» разрядына ие болды. Ал қазақ күресі бойынша жауырыны жер тимеген жас бүлдіршін қазақ күресінен аудандық, облыстық біріншіліктердің, турнирлердің жеңімпазы, республикалық чемпионаттардың жүлдегері Айымжанов Ислам «Қазақ күресінен ҚР спорт шеберлігіне кандидат» разрядына қол жеткізді.
«Аудан көлемінде спортпен шұғылдатындардың, әсіресе жастардардың саны артып келеді. Олар карантин уақытында да салауатты өмір салтын ұстанып, спорттан қол үзбеді. Мәселен, оқу процесі кезінде БЖСМ-нің жаттықтырушы ұстаздары онлайн түрінде тапсырма беріп, оны жаттығушылар бейнежазбаға түсіріп, кері жіберу арқылы сабақтар жүріп отырды. Болашақта үміт артып отырған спортшыларымыз талай бәйгелерден орын алып, «Спорт шеберлері» деген атаққа ие болады деп ойлаймын,- дейді аудандық мәдениет, тілдерді дамыту, дене шынықтыру және спорт бөлімінің бас маманы Э.Сағындықов.
Аман Ізмұхан
Шыңғырлау ауданы
zhaikpress.kz
