Шыңғырлау ауданының спортта атағы мен даңқы қай уақытта да жоғары. Өткен ғасырдың 60-70 жылдары, одан беріде небір майталман спорт саңлақтары аудан атын әр спорт түрінен көтеріп келді. Шыңғырлаудың боксшылары әлі күнге аңыз боп айтылады, ал Қази Сырымов сынды ағаларымыздың ізбасарлары күрестен жеңіс туын талай желбіретті.
Аудан спортында есімдері елге танылған Мантай Каймулдиев, Тілекқабыл Имашев, Ержан Төлегенов, ағайынды Бақтыбай, Серікбай Қасымовтар, Александр Пятин, Әскербай Саматов, Талаптыер Дүйсебаев, кейінгі жылдардың танымал тұлғалары Еділ Ишекенов және бүгінгі күнге дейін күрестің қай түрінен де жүлдегерлер мінберінен түспей келе жатырған Қайсар Құсайынов сынды спортшылар ел мақтанышы!
Кейінгі буын осынау атақты спортшыларға бой түзеп, өсіп келеді. Аудан спорты қазір талапты жастарға толы. Спорттың түрлі саласында аудан, облыс қана емес, республика көлемінде жеңімпаз жастарымыз бар.
Ауданымыздан өсіп шығып, қазір әскер қатарында борышын өтеп жүрген Тоқтар Байғабылов та осындай спортқа бейім жас. Бала кезінен самбо күресіне бет бұрған Тоқтар белгілі жаттықтырушы Қайсар Құсайыновтың шәкірті. Спорт шеберлігіне үміткер. Самбо және қазақ күресінен жасөспірімдер арасында Батыс Қазақстан облысының жеңімпазы. Республикалық жарыстардың бірнеше дүркін жүлдегері. Орал қаласындағы педогогикалық колледждің «Денешынықтыру және спорт» бөлімінің түлегі. Қазіргі таңда Сарыөзек қаласындағы әскери бөлімде қатардағы жауынгер шенінде Отан алдындағы борышын өтеп жүр.
Жуырда, әскерилер арасында «Оңтүстік» өңірлік қолбасшылығының чемпионатында самбо күресінен бәсекелі белдесу өткен болатын. Осы бәсекеде 58 келіге дейін салмақ дәрежесінде 4 белдесуді жеңіспен аяқтап, ақтық сында есе жіберіп алған жерлесіміз жарыстың күміс медалін жеңіп алды. Алайда әбжілдігі мен күресу техникасы, шеберлігі басым жас спортшы Қазақстан Республикасы Қарулы Күштерінің біріншілігіне жолдама алып отыр.
Жерлесіміздің бұл жеңісі бізге де үлкен мақтаныш. Ауданымыздың бір баласы қиырда жүріп, қанжығаға олжа салып жатырса, туған ел талантты ұлымен, әрине, мақтанады!
Қаршыға Асу,
Шыңғырлау ауданы
