Казталов ауданы Жалпақтал ауылында туған өлкесінің көркеюіне атсалысып жүрген мектеп түлектерінің қатары жыл санап артып келеді. 2013 жылы басталған әр жылғы түлектердің бұл бастамалары кейінгі жылдары дәстүрге айналды.
1965 жылы туған перзенттер өздерінің мектеп бітіргендеріне 40 жыл толу құрметіне орай ауылдың қақ ортасын бөле-жара ағып жатқан Қараөзеннің үстіне төселген автокөлік жүретін көпірді күрделі жөндеуден өткізіп, қайтадан пайдалануға берсе, 1975 жылы туған перзенттер өздерінің мектеп бітіргендеріне 30 жыл толу құрметіне орай Ғинаят Молдашев атындағы жалпы орта білім беретін мектебінің ауласына «Street workout» жаттығу алаңын, 1985 жылы туған перзенттер өздерінің мектеп бітіргендеріне 20 жыл толу құрметіне орай Кенжебек Меңдалиев атындағы жалпы орта білім беретін мектебінің ауласына футбол алаңын сыйлыққа тарту етті. Болашақта бұл бастамалар жалғасын табатын болады дейді түлектер.
Кеше Соңғы қоңырау салтанатында түлектер тартуындағы жаңа нысандардың салтанатты ашылу рәсімдері өткізілді. Онда аудан әкімі Рүстем Зұлқашев пен Жалпақтал ауылдық округінің әкімі Әлия Жақсыбаева сөз сөйлеп, туған жеріне өлшеусіз үлес қосқан Жалпақтал ауылының барлық елжанды түлектеріне аудан тұрғындары атынан алғысын білдіріп, оларға ауылды көркейтуге қосқан зор үлестері үшін алғысхаттар табыс етті.
Сондай-ақ салтанатты шара барысында ардгерлер, ұстаздар, мектеп түлектері сөз алып, жас түлектерге толайым табыстар тіледі.
Қыдыр Харесұлы,
Казталов ауданы
