Таңғы сағат 04:49 - да Сырым аудандық №14 өрт сөндіру бөлімінің кезекшісіне Алғабас ауылындағы Абылайхан көшесі №5/1 үйдің қоражайында өрт басталғаны туралы хабарлама түседі.
Жарақтанған жалын жауынгерлері мен төтеншеліктер дереу аудан орталығынан 60 шақырым шалғай жатқан ауылға аттанды, сағат 06:09 - да оқиға орынында болды.
Алаудың ауқымы алапат екен.
240 шаршы метр аумақты от шарпыған. Ішіңді күйдіретіні ол емес, 375 тонна қысқы мал азығы жанып кеткен. 375 тонна мал азығы дегенің - 1500 бума шөп. Ол аздай, 10 тонна ірі азық мен 4 тонна жанғыш сұйықтық (дизель отыны) бірге өртенген.
Сырым аудандық төтенше жағдайлар бөлімінің бастығы, азаматтық қорғау подполковнигі Ғабит Жасталаптың айтуынша, қызыл жалын көршінің де қоражайына “ауыз салып” Абылай хан 5/2 мекеніндегі үйдің шаруашылық ауласының 240 шаршы метр аумағын, соның ішінде 100 бума шөбін жалмады.
Ала жаздай маңдай терін сыпырып, күннің астында жүріп жинаған пішені санаулы сағатты күлге айналып, шаруалардың қабағын кірбің басты. Күз болса есіктен кіріп келеді.
Желді күні жалын көлемі екі үйден асып тұтас көшеге, тіпті әрі қарай далаға жайылуы бек мүмкін еді. Өрт сөндірушілер мен төтеншеліктер тілсіз жауды ошағынан шығармай тоқтатты.
Жігіттерге Тоғанас ауылындағы мемлекеттік емес өрт сөндіруші мекеме де көмекке келген.
Ал оқиғаның себептері болса, анықталуда. Бұл жағдай бізге қауіпсіздік мәселесін қатерден шығармауды түйсіндіргендей.
Бауыржан Ширмединұлы,
Сырым ауданы
