Үй жануарларының қатысуымен болатын жол-көлік оқиғалары бүгінде алаңдатарлық деңгейге жетті. Жол үстіндегі бір сәттік бейқамдық – адам өміріне де, темір тұлпарға да қауіп төндіретіні сөзсіз. Осы мәселені шешу мақсатында Сырым ауданында нақты қадамдар жасалып жатыр.
«ҚазАвтоЖол» АҚ Ұлттық компаниясы БҚО филиалы, Жымпитыдағы №39 жол-пайдалану бөлімшесі қазіргі таңда Ақтөбе–Орал бағытындағы жолды 389-384 шақырым аралығын, яғни 5 шақырым бөлігінің сол жақ қапталын темір тормен қоршауды қолға алды. Мұндағы мақсат – төрт түліктің тас жолға тосыннан шығып, апатты жағдай туындатуын болдырмау.
Темір тор – жануарға тосқауыл, жүргізушіге қорған. Десе де, бұл – тек бір бағыттағы шешім. Көлік жүргізушілердің де, мал иелерінің де жауапкершілігі қатар жүруі тиіс. Тәртіп пен техникалық шешім қатар жүргенде ғана жол қауіпсіздігіне қол жеткізуге болады.
Сырым ауданы аумағынан өтетін республикалық маңызы бар «Ақтөбе–Орал», облыстық маңызы бар «Ақсай–Жымпиты» және «Жымпиты–Қаратөбе» бағытындағы тас жолдарда ауыл шаруашылығы жануарларының қатысуымен болатын жол-көлік оқиғалары көбеймесе, азаймай тұр.
Бақылаусыз жүрген төрт түлік – тек жолдағы апат емес, заң алдындағы жауапкершілік екенін ескерген жөн. Осы тақырыпта аудандық полиция бөлімінен ақпарат алған болатынбыз.
Сырым аудандық полиция бөлімінің бастығының орынбасары, полиция майоры Амангелді Мекин айтуынша, 2025 жылдың алғашқы жартыжылдығында 11 жол-көлік оқиғасы тіркеліп, соның салдарынан 1 адам жарақат алған. Ал 2024 жылы мұндай 6 оқиға орын алған. Жануар иелері тек 3 оқиға бойынша ғана анықталса, 8 оқиғада әлі күнге дейін мал иесі табылмаған.
Әсіресе, «Ақтөбе–Орал» тас жолының Тоғанас, Алғабас, Жымпиты және Бұлдырты ауылдарының тұсында (326-336, 380-393 және 409-439 шақырым аралығы), «Жымпиты–Қаратөбе» тас жолының 7-60 шақырымында және «Ақсай–Жымпиты» жолының 17-19 шақырымында күндіз де, түнде де үй жануарларының жолға шығу деректері жиілеген.
Мұндай тәртіп бұзушылықтар ҚР ӘҚБтК-нің 408-бабымен қарастырылып, осы жылдың 6 айында 175 әкімшілік құқық бұзушылық анықталып, аудан тұрғындарына тиісті хаттамалар толтырылды.
«Алдағы уақытта үй жануарларын ұжымдық бағуды ұйымдастыру, арнайы жайылым мен айдау бағыттарын белгілеу, бұл іске округ әкімдерін тарта отырып, бірлескен шешім қабылдау жоспарлануда», – дейді полиция майоры.
Сіз не дейсіз, оқырман? Жол жиегін тормен қоршау - апаттың алдын алудың бір жолы. Тағы қандай жолы бар?! Малдың бағымсыз, иесіз жүруі де қатерлерге себеп емес пе?! Неге малға түйісе береміз?!
Қ.Жеңісұлы
Сырым ауданы
