Сырым ауданы әкімдігінің мәжіліс залындағы салтанатты жиынға келген аналардың бірі - шолақаңқатылық Гауһар Меңдіғалиева. Жасы отыздан енді асқан замандасымыз бүгін “Күміс алқа” иегері атанды. Жолдасы Ақылбек - “Правда” шаруа қожалығында жылқышы. Гауһар екеуі құлын мен тайдай болған 4 қыз бен 2 ұл тәрбиелер отыр.
Осы секілді, талбұлақтық Раушан Мұқашеваның мойынына да “Күміс алқа” тағылды. Әрине дүниеге келген әр сәби елдің демографиялық өсіміне әсер етеді ғой. Бірақ, Асланбек пен Раушан көп балалы ата - ана атану арқылы Талдыбұлақ секілді тұрғын саны аз, мектепте оқушы тапшылығы болып тұратын округтің өмірінде маңызды рөл ойнап отыр.
Өлеңтілік ана Нұржанат Кунеева 2023 жылы жетінші перзентін дүниеге әкелді. Бисенғалиевтер шаңырағы бесіктой тойлаудан әсте жалыққан емес. Азаматы Аманжол екеуі балаларын үйдің емес, елдің ұл - қызы етіп тәрбиелеуде. Үлкендері Ақтілек пен Әділбек - спорт пен өнердің үздіктері. Әділбек қазір Орал қаласындағы Олимпиада резервтерін даярлайтын мамандандырылған спорт интернатында білім алуда. Чемпиондардың анасы Нұржанат Дауылбайқызы бүгін “Алтын алқа” иегері атанды.
ҚР Президенті Қасым - Жомарт Тоқаевтың арнайы Жарлығына сәйкес жолданған наградаларды Сырым ауданының әкімі Жұмагелді Батырниязов табыс етті.
Бауыржан Ширмединұлы,
Сырым ауданы
