Осы айда Сырым ауданында жаңа кітапхана оқырмандарға есігін айқара ашады. Бүгін Сырым ауданының әкімі Жұмагелді Батырниязов орынбасары Серік Тоқмамбетовпен бірге құрылыс алаңында болып, соңғы жұмыстармен танысты.
Құны 432 млн теңгені құрайтын жобаның іргетасы былтыр құйылып, қос қабатты еңселі ғимараттың құрылысы биыл аяқталды. Нысан М. Есламғалиев атындағы орталықтандырылған кітапханалар жүйесінің меншігіне беріледі.
Кітапхана директоры Айнұр Уалиахметтің айтуынша, Жымпиты кітапханасы осы арқылы 90 мың кітаптан тұратын жазба мұраны жаңа заманға жеткізгелі отыр.
Жаңа ғимаратты тек кітапхана деуге болмайды. Мұқадес атындағы сарайда оқырмандарға арналған смарт-аудиториялар, коворкинг орталықтар, 120 орындық АКТ залы, белгілі қаламгерлер арасындағы оқу залдары, тіпті мүмкіндігі шектеулі адамдарға арналған бөлмелер болады. Руханият ордасы 8 тамыз күні ресми ашылады.
Бауыржан Ширмединұлы,
Сырым ауданы
