Бүгін Сырым Датұлы атындағы тарихи-өлкетану музейінің ұйымдастыруымен Жәрдем Тілековтың 110 жылдығына орай "Сырым батыр" дастанынан үзінді оқудан екінші рет байқау өтті.
Жыр байқауын Сырым ауданы әкімінің орынбасары Асланбек Сарқұлов ашты. Жәрдем Тілековтың немере ағайыны Сағынғали Айтанов сөз сөйледі.
Балалар арасында кітап оқуды насихаттау, оқырмандық көзқарасын кеңейту, шығармашылық және зияткерлік қабілетін дамытуға жағдай жасау, ұлттық жыр жанрына баулу, талантты ұрпаққа қолдау көрсетуді мақсат еткен байқауға ауылдық округтерден 5-8 сынып аралығындағы 17 оқушы қатысты.
Жырсүйер оқушылардың анық сөйлеу мәнерін, логикалық екпінін, дауыс ырғағын, эмоционалды-экспрессивті бояуын, мәтіннің бейнелік жүйесі мен мазмұндық құрылымын терең сезінуін, актерлік шеберлігін, жырға сай киінуін, музыкалық сүйемелдеуі мен декорациясын қазылар алқасының төрағасы, аудан әкімінің орынбасары Асланбек Сарқұлов пен мүшелері Самал Батырова, Айнұр Уалиахметова, Дина Қажығалиева, Нұртілеу Болат бағалады.
"Сырым батыр" жырын жатқа оқуда Бұлдырты орта мектебінің оқушысы Гүлсезім Ерғожиева бірінші орынға және 15 мың теңгенің сертификатына ие болды. Екінші орын мен 10 мың теңгелік сертификат Қ.Мырзалиев атындағы орта мектептің оқушысы Нұртаза Амандыққа табыс етілді. Ал үшінші орын мен 5000 теңге Абай орта мектебінің шәкірті Данияр Молдашқа бұйырды.
Қазылар алқасы жүлделі орын иеленушілерге жетеғабыл жыр оқыған Сырым орта мектеп-балабақша кешенінің оқушысы Айша Орақ пен Көздіғара негізгі мектебінің оқушысы Ұзақбай Қайырболаттың да көңілден шыққандарын айтты.
Шынар Молданиязова,
Сырым ауданы
zhaikpress.kz
