Бүгін Орал қаласында облыс мектептер арасындағы футбол лигасының финалдық ойыны өтті.
Жасыл алаңда Орал қаласының құрамасы мен Сырым ауданының жас аяқдопшылары кездесті. Матчтың 23-ші минуты. Есеп 3:2. Сырымдықтар үшінші голды салып, басымдыққа ие болғаннан кейін, ойынды сабырлы жүргізе бастады. Ал, Орал құрамасы дүркін - дүркін шабуылға көшкен. Себебі, жеңіс қолдан сырғып барады. Табло да оларға қарсы жұмыс жасап жатқандай.
Міне, сырымдықтар да қарымта шабуылға шықты. Аяқтан аяққа көшкен доп қарсылас қақпаның алдына жақындап келеді. Алатопалаң. Көп ұзамай трибуна шу етті. Доп Орал құрамасының қақпасында жатыр. Сырымдық шабуылшы Радмир Балмұратов әріптесі берген пасты, ұтымды пайдаланып, допты қақпаға бағыттаған екен. Гооол! Есеп 2:4. Ашынған қарсылас ашық текетіреске көшті. Дереу бір гол салып, есеп айырмасын қысқартты. Алайда, Радмир салған гол финалдық кездесудің нүктесін қойды. Сырым ауданы - чемпион.
Алаңда ауданның намысын қорғаған жас футболшылар Қ. Мырзалиев атындағы мектепте оқиды. Олар лиганы әп - дегеннен сәтті бастаған. Өз тобында Жаңақаланы 5:0, Қазталов құрамасын 5:2 есебімен ұтты. Ал, 1/2 финалда Теректіге де еш мүмкіндік бермеді. Ойынды 5:0 - мен аяқтады. Финалдык кездесудің қорытындысы көрерменге аян.
Көрермен демекші, лиганы тамашалауға келген оралдық жанкүйерлер біздің қақпашылар - Әскер Наурызбаев пен Кенен Әділеттің шеберлігіне таңданып, ойыншылар - Арсен Мұратов, Мақсот Нұрсұлтан, Ержан Қожанов, Руслан Еркін, Әли Сейітқазиев, Дәурен Есмағұл, Радмир Балмұратов, Мирхат Өтекешовтің доп игеру өнеріне қол соққан. Команда жетекшісі - Ерлан Чукуров. Бас бапкер - Руслан Чукуров. Қ. Мырзалиев атындағы мектептің командасы енді лиганың республикалық кезеңінде бақ сынайды.
Команданың облыстық лигада бақ сынауына Сырым ауданының білім беру бөлімі қолдау көрсетті. Ал, "АрланТранс" ЖШС жас аяқдопшыларға футбол формасы мен доп алып берген.
Бауыржан Ширмединұлы,
Сырым ауданы,
zhaikpress.kz
