Сырым ауданы әкімі Жұмагелді Батырниязов Сарой ауылдық округінің тұрғыны, көпбалалы ана, ұстаз Жұмашева Марианна Ергенқызын ҚР Президент Жарлығымен «Күміс алқа» мемлекеттік наградасымен марапаттады.
Марианна Ергенқызы — алты баланы дүниеге әкеліп, оларды өнегелі тәрбиеге баулып отырған ардақты ана. Ол Абай мектеп-бөбекжай-балабақша кешенінде бастауыш сынып мұғалімі болып қызмет атқарады. Ұстаздық қызметпен қатар, көпбалалы ана ретінде бала тәрбиесіне ерекше жауапкершілікпен қарап келеді.
Ер азаматы Нұржігіт Кенесарин – еңбекқор азамат. Ол Сырым электр торабына қарасты Сарой ауылының көрігінде электромонтер болып жұмыс істейді. Ерлі-зайыптылар балаларының сапалы білім алып, саналы азамат болып өсуіне бар күш-жігерін салып келеді.
Отбасының тұңғышы Дінмұхамед – Астана қаласындағы Сәкен Сейфуллин атындағы Қазақ агротехникалық зерттеу университетінің студенті. Кейінгі балалары Алихан, Мансур, Айәділ Абай мектеп-бөбекжай-балабақша кешенінде білім алуда. Кіші ұлы Әміре сол мектеп жанындағы шағын орталықта тәрбиеленіп жатыр. Кенжесі Аңсағаным ата-анасының қамқорлығында.
Балалардың барлығы тәрбиелі, білімге құштар, түрлі үйірмелерге белсенді қатысады. Үйде де, мектепте де тәртіптері үлгілі, ата-анасына қолғабыс етіп, бір-біріне қамқор болып өсіп келеді. Ұлдары қарындастарына жанашыр, отбасылық құндылықтарды жоғары қоятын азамат болып қалыптасуда.
Шынар Молданиязова
Суреттерді түсірген Айман Өтеғалиева
Сырым ауданы
