Елдегі жарияланған төтенше жағдайға орай Президентіміздің үндеуінде айтылған коронавирус пандемиясына байланысты сақтық шараларын күшейту жөніндегі тапсырманы сырымдықтар да ықыласпен орындауда.
Халықтың саулығына алаңдаулы аудан еріктілері Сырым аудандық жастармен жұмыс жөніндегі ресурстық орталығының ұйытқы болуымен көпреттік бетперде тігуді қолға алды. Аудандық жастармен жұмыс жөніндегі ресурстық орталық қажетті материалмен қамтып, еріктілер тігін мәшинелерін әкелді.
Бүгін түстен кейін басталған жұмыс барысында олар үш сағаттың ішінде 200 бетперде тігіп бітірді. Белсенді қолұшын берген еріктілер қатарында аудандық ішкі саясат бөлімінің бас маман-есепшісі Жанаргүл Кәрімғалиева, Сырым мемлекеттік коммуналдық мекемесінің қызметкері Айгүл Баянғалиева, "Аяна" шаштаразының иесі Айгүл Қанекенова бар. Игілікті іске "Nur Otan" партиясының Сырым аудандық филиалының қызметкері Мира Мұхамбедиева, "Сырым елі" газетінің тілшілері, аудан жастары да атсалысты.
Бетперде тігуге үлестерін қосқан ең жас еріктілер Шахарбану Болатованың жасы 9-да болса, Заңғар Махметтің жасы 10-да.
Халық саулығы үшін қолға алынған бетперде тігу ісі жалғасын таба бермек. Көмек қолын созуға ниетті тігіншілер болса, асарлатуға келуге болады.
Шынар Молданиязова
Сырым ауданы
zhaikpress.kz
Батыс Қазақстанның маңызды жаңалықтарын біздің Instagram-дағы парақшамыздан және Telegram арнамыздан алғашқы болып біліңіздер
