Сырым ауданында ақын, Қазақстанның Халық жазушысы Қадыр Мырза Әлидің құрметіне орай мектеп оқушылары арасында Қадыр оқулары өтті. Өлең тойы Жымпитыда 12 мәрте өтуде.
Ақынның қарындасы Күләш Мырзалиева, Сырым ауданының құрметті азаматы Құсайын Бахтияров, әнші - сазгер Донеділ Қажымов секілді меймандар алдымен Қ.Мырзалиев атындағы орта мектепке бас сұқты. Білім ордасындағы Қадыр мұражайындағы жәдігерлермен танысты.
ХІІІ облыстық Қадыр оқуларының аудандық кезеңі ақын атындағы мектепте өтті. Меймандар ақын өлеңдерін жатқа оқыған өрендердің өнерін тамашалап, тәнті болды. Байқауға қатысушы оқушылармен естелік суретке түсті.
Байқау қорытындысына жүлде алған оқушылар көп. Солардың бірқатарын ғана атап өтелік. «Сөзім барда – өзім бар» мәнерлеп оқу бөлімінде бас жүлдені Рахман Хайырбек жеңіп алды.
Ақынның 127 өлеңін жаттаған Рахман Бұлдырты орта мектебінің 6-сынып оқушысы, томағасын сыпырып дайындаған жетекшісі – З.Берниязова. I орынды Қособа мектеп балабақша бөбекжай кешенінің 6-сынып оқушысы Айым Талаптан иеленді, жетекшісі – М.Есентемирова. «Болу үшін жаралғам туған жердің жырауы...» бөлімінде I орын Бұлан мектеп-балабақша-бөбекжай кешенінің 7-сынып оқушысы Ақбаян Сағидоқасқа бұйырды. Ақбаянның жетекшісі – К.Кунанова. «Өлең жаздым тоғыз тарау, жеті өрім» жас ақындар бөлімінде бас жүлдені Қособа мектеп-балабақша-бөбекжай кешенінің 9-сынып оқушысы Айсезім Қаспай жеңіп алды, жетекшісі – С.Бөпениязов. А.Жұмағалиев атындағы мектеп-балабақша-бөбекжай кешенінің 11-сынып оқушысы Гүлден Ерболқызы I орынға ие болды. Жүлдегердің жетекшісі – Д.А.Жанғалиева.
Бастауыш буын арасында өткен Қадыр оқуларында бас жүлдені Даяна Хусайын қанжығалады. Даяна Бұлдырты орта мектебінің 3-сыныбында оқиды, сынып жетекшісі – М.Мутиева. І орынды Абай мектеп-балабақша-бөбекжай кешенінің 2-сынып оқушысы Жаннұр Жәрдемғали еншіледі. Жетекшісі – А.Орынғалиева.
Мектепалды даярлық сыныбы бойынша бас жүлдені жеңіп алған – Нұрислам Хусайн. Нұрислам Бұлдырты орта мектебінде оқиды, жетекшісі – А.Негметова. 1 орынды Қ.Мырзалиев атындағы орта мектептен Кәусар Маликова иеленді, жетекшісі – А.Бердигужиева.
Балабақша, шағын орталық тәрбиеленушілері арасында бас жүлдені қазылардың сүйкіміне бөленіп, тәнті қылған Сырым мектеп-балабақша-бөбекжай кешені жанындағы Жетікөл шағын орталығынан келген бүлдіршін Аянат Төлеген иеленді. Аянаттың жетекшісі – А.Шапенова. Ал, аудан орталығындағы «Балдырған» балабақшасының тәрбиеленушісі Аяжан Мұхамбет 1 орынға ие болды. Аяжанды аламан топқа қосқан тәрбиеші – Р.Жанқылышева.
Іс-шараға қатысушылар жыр додасынан кейін Сырым Датұлы атындағы тарихи-өлкетану музейін аралады.
Шынар Молданиязова,
Сырым ауданы
