Жаңақала ауданы әкімдігінің кіші мәжіліс залында тамыз мәслихаты өтті.
«Жаңа инновациялық технология: сапалы білім, саналы тәрбие» тақырыбындағы аудандық білім беру қызметкерлерінің тамыз конференциясы жоғары деңгейде ұйымдастырылған. Ауыл-аймақтағы және залға сыймаған мұғалімдер қауымы Zoom бейнебайланыс платформасы арқылы экранда жүздесіп, биылғы оқу жылындағы өзгерістерге қанық болды. Facebook әлеуметтік желісінде тікелей эфирден тамашалауға да мүмкіндікті жасап қойған екен. Алғаш боп сөз алған аудандық білім беру бөлімінің басшысы Р.Ғұмар:
- Өткен оқу жылының қорытындылары сараланып, жаңа оқу жылы басталар алдындағы атқарылар істеріміздің басым бағыттары мен алдағы міндеттері айқындалар бүгінгі мерекелік сәт – дәстүрлі тамыз концеренциясының ашылу салтанатымен бәріңізді құттықтаймыз! Тамыз конференциясы жайдары жаздың соңғы күндерінде өтетін ұстаздық мамандыққа деген сүйіспеншілікке толы педагогикалық дәстүр. Өйткені өз ісінің шебері бола білген, жас ұрпаққа білім мен тәрбие беруде аянбай тер төккен ұстаздың еңбегі еленіп, көпшілік алдында марапатқа ие болар, ең бір жүрек толқытар салтанатты сәті де осында, - деді бұл шараның маңызына тоқталып. Одан әрі аудан әкімі Наурызбай Қарағойшин ұстаздар қауымын жаңа оқу жылымен құттықтап, толағай табыс пен сәттілік тіледі.
Zoom бейнебайланыс платформасы арқылы «Өрлеу» біліктілікті арттыру ұлттық орталығы акционерлік қоғамының филиалы «Батыс Қазақстан облысы бойынша педагогикалық қызметкерлердің біліктілігін арттыру институты» директорының оқу-әдістемелік ісі жөніндегі орынбасары Елдос Сафуллин сөз сөйлеп, өзінің тәжірибесімен бөлісті. Мектепке дейінгі ұйымдар атынан «Бөбек» аудандық балабақша-бөбекжайы МКҚК-ның әдіскері Гүлшат Меңдәлі жаңа оқу жылына арналған бағдарламасына тоқталып, жұмыс жоспарын баяндады. Қ.Жантілеуов атындағы балалар саз мектебінің - домбыра сыныбының оқытушысы Гүлбар Шуақбаева қосымша білім беру ұйымдары атынан сөз сөйлеп, «Абай әлеміне саяхат» атты сабағын таныстырды. Оқушылар атынан сөз алған Айдархан ЖОББМ-нің 11-сынып оқушысы Дильназ Дидарқызы мұғалімдері құттықтап, өзінің жүрекжарды жырын оқып берді. Тамыз мәслихаты табысты өтті деп нық сеніммен айта аламыз. Олай дейтін себебіміз аудан тарихында тұңғыш рет Қ.Жантілеуов атындағы балалар саз мектебінің домбыра сыныбының оқытушысы Гүлбар Тұрланқызы Қазақстан Республикасының Білім және ғылым министрлігінің «Ыбырай Алтынсарин» атындағы төсбелгісімен награтталды. Қазақстан Республикасының Білім және ғылым министрлігінің Құрмет грамотасына Н.Сисенғазиева (Карманов атындағы ЖОББМ-Б), А.Лепесов (М.Жүнісов атындағы ЖОББМ), З.Бисембиева (С.Меңдешев атындағ ЖОББМ), Б.Есенгелиева (Е.Орақбаев атындағы ЖОББМ), А.Мұратқызы (Жаңақала ЖОББМ), Ж.Қабашева (Айдархан ЖОББМ), Н.Мақсотқызы ((М.Жүнісов атындағы ЖОББМ), С.Өтегенқызы (Жаңақала М-Г) ие болды. Т.Қойшығалиева (Д.Нұрпейісова атындағы ЖОББМ), Ғ.Өтегенова (М.Жүнісов атындағы ЖОББМ), Ж.Иманғазиева (№3 ЖОББҚМ), Н.Мырзағалиева (Ә.Жангелдин атындағы ЖОББМ),Б.Бисекешова (Жаңақала аудандық балалар бөбекжайы) Қазақстан Республикасының Білім және ғылым министрлігінің алғысхатымен марапатталды. Ал облыстық білім басқармасының Құрмет грамотасы Д.Сарбаева (Х.Нұрымғалиев атындағы ЖОББМ), С.Қисымова (Д.Нұрпейісова ЖОББМ), Р.Оспанова (Карманов ЖОББМ-Б), З.Ізмағамбетова (Пятимар ЖОББМ), Ш.Бисенғалиева (М.Мирманов атындағы ЖОББМ), Д.Рамазанова (Жаңақала М-Г), А.Нұрболатқызы (№3 ЖОББҚМ), А.Жұмағазиева (Айгөлек бөбекжайы), Б.Қадыралиева (Жаңақала аудандық балалар бөбекжайы), Қ.Шүкіроваға (Пятимар атындағы ЖОББМ) табысталды. Алғысхат пен Құрмет грамотасын алған мұғалімдердің легі бұнымен бітпейді. Бұдан бөлек біраз мұғалімге аудан әкімінің алғысхаты, аудандық білім беру бөлімінің Құрмет грамотасы және облыстық, аудандық кәсіподақ ұйымының грамоталары табыс етілді.
Қуанышты хабар А.Ғұбайдоллақызы (Жаңақала М-Г) мен А.Есмағұлов (Жаңақала аудандық жас туристер станциясының директоры) Батыс Қазақстан облыстық білім басқармаы ғимаратының алдындағы, яғни облыстық «Ұстаздар үйінің» алдындағы Құрмет тақтасынан орын алды. Табысқа толы тамыз мәслихатының соңы естелікке суретке түсуге ұласты.
Жанайдар Болатбекұлы,
Жаңақала ауданы
zhaikpress.kz
