Тасқала ауданы орталығындағы «Ардагерлер» саябағында «Жасыл ел» жастар еңбек жасағының ашылу маусымы өтті.
Оған аудан әкімі Талғат Шакиров, аудан әкімінің орынбасары Саягүл Галиева арнайы қатысып, жастарға сәттілік тілеп, аталмыш бағдарламаның жастарды еңбекке баулуға, туған жерін абаттандыруға үйретудегі алар орны ерекше екенін тілге тиек етті.
Тасқала ауданында 2017 жылдан бері «Жасыл ел» жастар еңбек жасағы жұмыс жасайды. Жастар жасағының негізгі жұмысы – аудан орталығы көшелеріндегі гүлдерді күтіп-баптап, саябақтарды арамшөптен тазарту, көгалдандыру мен абаттандыру.
«Жасыл ел» бағдарламасы жазғы маусым кезінде студент жастарға үлкен мүмкіндік. Олар тек туған жер тазалығын сақтауға ғана емес, ортақ шаңырағымыз – Қазақстанның гүлденуіне де зор үлес қосып жатыр.
Жауапты жаңа буын тәрбиелеп, кейінгі толқынның бойында патриоттық рухты қалыптастыруда мұндай шаралардың маңызы үлкен. «Тәрбиенің төресі – еңбек» деп қазақ бекер айтпаса керек. Сондықтан біздер де жастардың еңбек жасақтарына сәттілік тіледік.
Гүлмира Мақанова,
Тасқала ауданы
