Көрісу – ең ізгі мерекелердің бірі. Бұл күні жақын-туыстар бір бірін іздеп, қонаққа барып, жаңа жылдың келуімен құттықтайды. Әсіресе қариясы бар үйлерге төбе көрсетіп, амандығын біліп көрісіп шығады.
Аталмыш мерекеге орай «Жасың құтты болсын!», «Бір жасыңмен!» деген тілектерде жиі айтылады. Сол күнгі таңнан бастап, үлкен-кішіге бірдей мерекелік көңіл күй анық сезіліп тұрады. Бала кезімізден үйдегі үлкендер ерте оятып, көрші-көлемге, жақын-туысқа көрісіп келуге жіберетіні есімізде. Барған үйдің ата-әже, аға-апалар баталарын беріп тәтті дәмнен ұсынады. Осының бәрі – елді ынтымақ, бірлікке, тәртіпке шақыратын амалдар.
Бүгін осы Көрісу айт мейрамына байланысты мәдени-демалыс орталығында Амал мерекесіне орай шараға Тасқала ауданы әкімінің орынбасары Саягүл Галиева, мәслихат төрағасы Жанар Бисенгалиева, ауданымыздың ақсақалдар алқасы, әжелер алқасы, халықтық «Ақтілеу» әжелер ансамблі, бөлім басшылары қатысты.
«Амал мерекесімен құтты болсын! Аман-сау болып жүре беріңіздер, ұзақ ғұмыр тілейміз. Дендеріңізге саулық, осылай ақ баталарыңызды беріп, немере-шөберлеріңіздің қызығына тоймай жүре беріңіздер, - деді аудан әкімінің орынбасары Саягүл Галиева.
Қоғамда зор еңбек сіңірген ардагерлеріміз ақ баталарын берді.
Гүлмира Мақанова,
Тасқала ауданы
