Тасқалада волейболдан аудандық турнир өтті. Сайыс Кеңес Одағының батыры Садық Жақсығұловтың туғанына 100 жыл толуына арналды.
Жарыстың ашылу салтанатына аудан әкімінің орынбасары Саягүл Ғалиева қатысты. Аудан мектептері арасында өткізілген турнир тек спортты насихаттау емес, сонымен қатар батыр жерлесімізді ұлықтап, келер ұрпақ алдында құрмет көрсету деп түсінген волейболшылар жарыс барысында барын салып, ойын көрігін қыздыра түсті.
Спортшыларға сәттілік тілеген Саягүл Мәулетқызы ұйымдастырушыларға алғыс айтты.
Сайыста волейболшылар сәтті ойын өрнегін көрсетіп, көрермен қошеметіне бөленді. Әртүрлі жастағы волейболшылардан құралған командалар ойын кезінде ауызбірлігі мен ұйымшылдығын байқатты.
Турнир батыр атындағы мектеп жанындағы спорт залында өткізілді. Қорытындысында аудан орталығындағы Қ. Сәтбаев атындағы мектеп командасы жеңімпаз атанып, өздерінің үздік екенін байқатты.
Шежін орта мектебі мен С. Жақсығұлов атындағы жалпы білім беретін орта мектеп командалары екінші және үшінші орындарды өзара бөлісті. Сонымен қатар Қайырбек Дәулетов «Үздік ойыншы», Ниязбек Сабыров «Үздік шабуылшы» атанды.
Сондай-ақ Арнас Кушанов «Үздік байланыстырушы», ал Ренат Нусанов «Үздік қорғаушы» аталымына ие болды. Жарысты ұйымдастырушылар қатысқан командаларға алғысын білдіріп, естелік сыйлықтар үлестірді.
Темірболат Әнуарұлы
Тасқала ауданы
