Елорда күні қарсаңында Тасқұдық ауылында су жаңа әмбебап спорт алаңы пайдалануға берілді. Нысанның салтанатты ашылу рәсімін Сырым ауданының әкімі Төлеген Төреғалиев пен ауыл тұрғыны Айтжан Ізбасов жүргізді.
- Қазақстан Республикасы Тәуелсіздігінің 30 жылдығы – біздің ел үшін жаңа белес, жаңа меже. Тәуелсіздіктің әр жылы елімізге, өңірлерге, ауылдарға табыс алып келуде.
Спорт алаңын салу – Елтай ауылдық округіндегі есептік жиындарда көтерілген мәселелердің бірі. Бұл алаң біріншіден, жастардың ғана емес, бұқаралық спортқа ынталы тұрғындардың сүйікті мекеніне айналады деп сенемін. Екіншіден, жас спортшылардың жаттығып, шыңдалуы үшін де осындай заманауи алаңдар қажет. Игілікке болсын! - деді аудан әкімі өзінің құттықтау сөзінде.
«Өңірлерді дамыту» бағдарламасы бойынша жүзеге асқан жобаның құны 15,2 млн теңгені құрайды. Алаңның көлемі – 525 шаршы метр. Мердігер «Жайық Сити» ЖШС нысанның құрылысын мамыр айында бастап, белгіленген уақытында аяқтады. Айта кетейік, бұл – Сырым ауданында биыл пайдалануға берілген екінші алаң. Осындай нысан Көгеріс ауылында да салынған болатын.
Жаңа алаңда шағын футболдан аудандық ашық турнир өтті. Турнирге Сырым ауданының командаларын бөлек, көршілес Бөрлі ауданының да футболшылары қатысты. Жергілікті командаға «Жайық Сити» ЖШС атынан сыйлыққа доптар берілді.
Бауыржан Ширмединұлы,
Сырым ауданы
zhaikpress.kz
