Бүгін Теректі аудандық білім беру бөлімінің жұмыс жоспарына сай кітапханада «Жыл мектеп кітапханашысы – 2024» кәсіби байқауының аудандық кезеңі өтті.
Мектеп кітапханашыларының шығармашылық жетістіктерін айқындау, жұмыс тәжірибелеріне заманауи инновациялық білім беру технологияларын енгізу, аталмыш мамандықтың мәртебесін көтеру байқаудың басты мақсаты болды.
Орайы келген тұста айта кеткен жөн, білім беру ошақтарындағы кітапханашылардың еңбегін елеу, осындай бағытта іс-шаралар яки сайыстарды өткізу 5 жыл бойы тұралап қалған еді. Қайта жанданған қолдау оларға шабыт бергені анық. Қатысушылардың мығым дайындықпен келгені қуантты. Тіпті жолдың алыстығына қарамай, шалғай ауылдан келгендер де бар. Бұл байқау 3 кезеңнен тұрды. Бірінші кезеңде «Менің мамандығым — кітапханашы» тақырыбы бойынша өздерін таныстырса, «Библиоэрудит» кезеңінде мамандық төңірегінде сұрақтарға жауап берді. Ал үшінші кезеңде өлкеміздің ақын-жазушылары шығармаларынан үзінді оқыды.
Бас-аяғы 10-ға жуық қатысушыдан суырылып алға шыққан Шаған мектебінің кітапханашысы Индира Балтабаева жүлделі 1-орынды иеленіп, облыстық кезеңге жолдама алды. Жайық негізгі орта мектебінің және Подстепный №1 мектебінің кітапханашылары Асхат Өтеуғалиев пен Айгүл Тариева 2-орынды еншіледі. Жүлделі 3-орынға Подстепный мектебінің кітапханашылары Құралай Мақашева мен Сандуғаш Ғабдығалиева, Новопавлов мектебінің кітапханашысы Алмагүл Өтеғалиева лайық болды.
Жүлдегерлерді әділқазылар марапаттап, естелік сыйлықтарды табыс етті.
Ақтілек Әлібекұлы,
Теректі ауданы
