ҚР Конституция күніне орай Теректі ауданына қарасты Шаған ауылдық округі орталығы Жаңаөмір ауылында үш қабатты 24 пәтердің кілті табысталды. Шағандағы қуанышқа БҚО әкімі Нариман Төреғалиев ортақтасып, баспаналы болған теректіліктерді құттықтады.
«Нұрлы жер» бағдарламасы аясында Теректі аудандық сәулет, қала құрылысы және құрылыс бөлімінің тапсырысы негізінде бой көтерген тұрғын үйді салуға 260 млн теңге қаражат жұмсалған. Құрылыс сегіз ай көлемінде жүріп, «Эврика» ЖШС сапаға жұмыс жасауға тырысқан. Жаңа пәтер кілттері жетім балалар мен ата-анасының қамқорлығынсыз қалған балаларға, көпбалалы отбасыларға, мемлекеттік қызметшілер мен бюджеттік сала қызметкерлеріне, әлеуметтік жағынан аз қамтылған топтар,толық емес отбасылар, ерекше балалары бар немесе оларды тәрбиелеп отырған отбасыларына ұсынылды.
Ата Заңымыздың мерекесі күні жаңа пәтердің кілтін қолына ұстап тұрған көпбалалы ана Жамал Исполова да қуанышын жасырып қала алмады.
Айта кету керек, облыс әкімі Нариман Төреғалиев осы көпбалалы Жамал Исполованың шаңырағында болып, алты бала тәрбиелеп отырған алтын құрсақты анаға су жаңа кір жуатын машинаны сыйға тартты.
Жаңа пәтердің кілтін қолына ұстаған теректілік ағайынды құттықтағандардың қатарында аудан басшысы Әлия Мұханбетжанова, аудандық мәслихат төрағасы Әлжан Нұрғалиев, «Эврика» ЖШС директоры Олег Тетера, Шаған ауылдық округі қоғамдық кеңесінің мүшесі Мұхамбетқали Бекжанов болды.
Әділет Орынбасарұлы,
Теректі ауданы
zhaikpress.kz
