Бүгін Достық үйінде Теректі ауданының «Мансап» орталығы филиалы атаулы әлеуметтік көмек көрсету және жұмыспен қамту бойынша бөлімшесінің басшысы Дархан Еслямғалиев, Теректі аудандық жастармен жұмыс жөніндегі ресурстық орталығының теолог маманы, Теректі аудандық мешітінің Бас имамы Амантай Бақтығалидің қатысуымен жиын өтті.
Оған ауыл тұрғындары, жастар куә болды. Басқосудың басты мақсаты – экстремизм мен терроризмнің алдын алу бағытында ақпараттық-түсіндіру еді. Жүздесу барысында Амантай Қуанышбайұлы теріс діни ағымдардың зардабы және олардан қорғану жолдары хақында әңгімеледі.
Сонымен қатар зайырлылық ұғымы, ҚР заңнамалары, діни қызмет пен діни бірлестіктер жұмысы жөнінде және азаматтардың құқықтары туралы баяндады.
Қатысушылар өздерін мазалап жүрген сауалдарын қойып, тұщымды жауап алып тарқасты.
Самал Жамет
Теректі ауданы
