Теректі ауданы орталығындағы кітапхана жаңа келбет алып, кітапхана жанынан «Қазына» коворкингі ашылды.
Оның ашылу салтанатына БҚО тілдерді дамыту басқармасының басшысы Айгүл Мыңбаева, «Жайық Пресс» ЖШС бас директоры Рауан Сәбитов, облыстық «Приуралье» газетінің бас редакторы Роза Сыикова, облыстық Ж.Молдағалиев атындағы әмбебап-ғылыми кітапхана директоры Шолпан Уразаева қатысты.
Келген қонақтарды аудан әкімі Әділ Жоламанов қарсылап, Федоров ауылындағы Марабай жырау ескерткішіне гүл шоқтары қойылды. «Қазынаға» қарай бет алған қонақтар мен аудан тұрғындарын, әр ауданнан келген кітапханашыларды «Ғазал» жас ақындар клубының мүшесі, Ж.Досмұхамедов атындағы педагогикалық колледж студенті Ақтілек Әлібекұлы жүрекжарды жыр жолдарымен күтіп алып, шараның шырайын кіргізді.
«Қазына» коворкинг орталығы мен жөндеуден өткен кітапхананың лентасын зейнеткер, кітапхана саласының ардагері Гүлнәр Аубакирова мен кітапхананың тұрақты оқырманы Сағидолла Бисенғалиев қиды.
Орталықтағы кітапхана расымен жаңа келбет алған. Оқырманның 34 ауылдық кітапхана туралы мәліметтерді QR – код арқылы алатын мүмкіндігі бар. Шахмат, тоғызқұмалақ ойындарын ойнап, теледидардан мультфильм тамашалауға арналған орын кішкентай теректіліктердің басын қосады.
Өркениет көшіне ілесу мақсатында кітап қоры цифрлы форматқа көшіріліп, кітапханалық үдерістер Web-RABIS бағдарламасы бойынша автоматтандырылған. QR Code Reader қосымшасы арқылы оқырмандар өз смартфондарына виртуалды сөреден кітапты жүктей алады. Оқырмандарға қолайлы жағдай туғызылып, тегін Wi-Fi аймағында 4 ноутбук жұмыс істеп тұр. «Робототехника» үйірмесінде коворкингке келушілер әдістемелік құралдар мен қажет құрылғылардың көмегімен робот жинай алады. Бейнесюжеттерді монтаждау, әзірлеуге де «Қазынада» мүмкіндік бар. Тізе берсең, орталықтың халыққа берері молынан.
Кітапхана директоры Р.Булатова, аудандық балалар кітапханасының меңгерушісі А.Жоламанова, кітапханашы Р.Мырзағалиева, қызмет көрсету бөлімінің меңгерушісі З.Сапарова және кітапхана қызметкері А.Галкин жоғарыда көрсетілген қызметтерге кеңінен тоқталып, таныстырды.
Коворкингтегі «Conference hall» залында аудан әкімі Әділ Жоламанов сөз сөйлеп, барша теректіліктерді құттықтады.
-Жастар жылында «Қазына» коворкингінің ашылуы аудан үшін елеулі оқиғалардың бірі. Бұл орталық жаңашыл жастардың ортасын қалыптастырып, көптеген игі шаралардың ұйытқысы болады деп сенеміз. Қуанышымызды бөлісуге келген барша қонақтарға теректіліктердің атынан алғыс білдіремін. Жылымызды осындай игі іспен қорытып, 2020 жылдан да жақсылық күтеміз,-деді аудан әкімі.
Аудандық мәслихат хатшысы Ә.Нұрғалиев, ауданның құрметті азаматы М.Төлегенов және ардагер ұстаз Ү.Сәрсенова ізгі тілектерін білдірді.
«Қазынаның» ашылуы «Кітапхана келбеті жалынды жастар көзімен» атты Open talk шарасына жалғасты. Шара барысында облыстың жас кітапханашылары жұмыстарымен таныстырды. Сонымен қатар Жұбан Молдағалиев атындағы облыстық әмбебап-ғылыми кітапхана директоры Шолпан Қуанышқалиқызы "Кітапхана ісінің ардагері" төсбелгісімен Усиля Какижанованы, "Кітапхана ісінің үздігі" төсбелгісімен аудандық кітапхананың әдістеме-библиографиялық бөлімінің меңгерушісі Айгүл Ряшева мен Ақжайық ауылдық модельді кітапханасының меңгерушісі Күнжамал Дусанованы марапаттады. Теректі аудандық мәдениет, тілдерді дамыту, дене шынықтыру және спорт бөлімінің басшысы Лунара Сердалиева сөз сөйлеп, бірқатар кітапханашыға алғыс хат табыстады.
Әділет Орынбасаров
Теректі ауданы
zhaikpress.kz
Батыс Қазақстанның маңызды жаңалықтарын біздің Instagr am-дағы парақшамыздан және Telegram арнамыздан алғашқы болып біліңіздер
