Жол көрсетсе, «осыларға болсын» деп, «біз көрмегенді көрсін» деп, аңқылдап, ақылын айтқан үлкендердің бағасын жете түсіну қанымызға сіңген әдет. Осы ғұрыпты сақтап қалу, ұрпақтан-ұрпаққа жеткізу үшін тырысқан жөн.
Осы орайда бүгін Теректі аудандық мәдени-демалыс орталығының ұжымы мәдениет саласының ардагерлеріне құрмет көрсетті. Ақ дастархан жайып, ерекше ықыласпен қарсы алды.
Қайырымдылық айлығы аясындағы жүздесуде мәдени-демалыс орталығының директоры Арман Сағидоллин сөз алып, ардагерлерге ақжарма лебізін айтты.
– Сіздердің еселі еңбектеріңіз, сара жолдарыңыз әрдайым есте. Ақ жаулықты әжелер ансамблі кез келген іс-шарадан табылып, жастарға үлгі көрсетіп келеді. Ұрпақтар сабақтастығы жойылмауы тиіс. Осы тұрғыда сіздермен бірлесе жұмыс істеуге әзірміз. Дендеріңізге саулық, бастарыңызға амандық тілейміз, - деді Арман Рахметоллаұлы өз сөзінде.
Ақ тілектер төгілген басқосуды әдістемелік бөлім меңгерушісі Айгүл Бекежанқызы тізгіндесе, Кәмшат Қадырғалиева «Ризамын» әнін шырқап, Оралхан Өтеғалиев қазақтың қара домбырасын күмбірлетті. Татьяна Хмарская бүгінгі таңда өтіп жатқан іс-шаралардың жоғары деңгейде екенін айтса, Макка Семғалиева да бұл пікірге қосылды.
Сала ардагерлері бірінен соң бірі тілектерін жаудырды. Ел есіндегі әндерді шырқап, жүздесудің әсерін сезіне алды.
Көрсетілген құрметке дән риза болып тарқасқан мәдениетке маңдай тері тамғандардың ақ батасы жас қауымды шабыттандырары анық.
Ақтілек Әлібекұлы
Теректі ауданы
